बझाङको जयपृथ्वी नगरपालिकाका मेयर चेतराज बजालले बझाङको सदरमुकाम चैनपुरमा निर्माण गरिएका अवैध संरचनाहरुलाई डोजर प्रयोग गरेर हटाउने बताएका छन् । मंगलबार प्रगतिशिल युवा समाज बझाङले आयोजना गरेको १२औं साधारण सभा तथा वार्षिक समिक्षा कार्यक्रममा सहभागीहरुको जवाफ दिँदै मेयर बजालले उक्त कुरा बताएका हुन् ।

मेयर बजालले भने, ‘बाटो मिचेर कसैले घर बनाएका छन् । चैनपुर व्यवस्थापनका लागि एउटा मास्टर प्लान बनाउँदैछौं । त्यो प्लान अबको तीन महिनामा बनाइ सक्नेछौं । नक्सा अनुसारको बाटो कसैले मिच्या छ भने २ इन्च पनि छोडिँदैन । त्यसका लागि म काठमाडौंका मेयर बालेनजस्तै डोजर हान्न तयार छु । साथीहरुले त्यसमा सहयोग गर्नुहोला ।’

धेरै स्थानीयहरुले नक्सा पासविनै सदरमुकाम चैनपुरमा घर बनाएकाले सूचना दिएर त्यस्ता संरचनाहरुलाई नगरपालिकाको भत्काउने अभियान रहेको उनको भनाई छ । केही इन्जिनियरसँग पनि आफूले छलफल गरेको र अझैं पनि यहाँका स्थानीयसँग छलफल गरेर सुन्दर स्मार्ट सिटी बनाउने योजनामा नगरपालिका रहेको मेयर बजालले दाबी गरेका छन् ।

मेयर बजालले आफू नगरपालिकाभित्रका समस्यासँग पहिल्यैदेखि परिचित भएकाले समस्या समाधानतर्फ चिन्तित रहेको बताए । उनले सुरुवातको एक महिनाभित्रै सिसिटिभी क्यामेरा जडान गर्ने र चैनपुरमा जथाभावी फोहोर फाल्नेमाथि निगरानी गर्दै कुहिने र नकुहिने फोहोरलाई व्यवस्थापन गरिने पनि बताए ।

‘नगरपालिकाका हरेक समस्याले आफूलाई राती निदाउँदा पनि चिन्ता थप्ने गरेको तर कतिसम्म गर्न सकिन्छ आगामी दिनले बताउँला,’ मेयर बजालले सहभागीहरुसँग भने । जयपृथ्वी नगरपालिकाबासी बढी परिणाम खोजिरहेकाले त्यसतर्फ आफ्नो ध्यान केन्द्रित रहेको उनको भनाई थियो ।