आसन्न निर्वाचनका लागि गठबन्धनभित्र सिट फाँडफाँटको टुंगो लगाउन सत्ता गठबन्धनमा आबद्ध पाँच दलका शीर्ष नेताहरूको आइतबारको बैठक पनि निष्कर्षविहीन बनेको छ ।

उनीहरूले आसन्न निर्वाचनका लागि गठबन्धनभित्र सिट फाँडफाँटको टुंगो लगाउन नसकेका हुन् । प्रधानमन्त्रीको सरकारी निवास बालुवाटारमा बैठक बसेको थियो । बैठक भोलि बिहान पुनः बस्ने नेकपा एकीकृत समाजवादीका सम्मानित नेता झलनाथ खनालले जानकारी दिए ।

उनका अनुसार सोमबार बिहान ८ बजे बालुवाटारमै बैठक बस्नेछ । सोमबार बस्ने शीर्ष नेताहरूको बैठकबाट सिट बाँडफाँटका विषयमा सहमति जुटाउने प्रयास गरिने उनले बताए । ‘आज लामो छलफल भयो । तर, सिट बाँडफाँटको विषयमा सहमति जुटेन,’ उनले भने, ।

उनका अनुसार भोलि बालुबाटारमा ८ बजे शीर्ष नेताहरूको बैठक बस्नेछ । सम्मानित नेता खनालले भने, ‘आवश्यकता अनुसार कार्यदलका साथीहरूलाई पनि बोलाइनेछ । हामी सहमतिमा पुग्छौँ ।’ सिट बाँडफाँटमा ५० प्रतिशत कुरा मिलिसकेको उनको भनाइ छ ।

सम्मानित नेता खनालले सिट बाँडफाँटको टुंगो लगाउने गरी भोलिको बैठक निर्णायक हुने बताए । सिट बाँडफाँटको टुंगो लगाउन यसअघि शीर्ष नेताले कार्यदल गठन गरी जिम्मा दिएका थिए । तर, कार्यदल ठोस सहमति जुटाउन असफल भएको थियो ।