भौतिक पूर्वाधार तथा यातायात मन्त्री मोहम्मद ईश्तियाक राईले बाँकेमा एकैदिन चारवटा पक्की पुल निर्माणको शिलान्यास गरेका छन् । मन्त्री राईले सोमबार बाँकेको डुडुवा गाउँपालिकाको डुडुवा नदीमा चार वटा स्थानमा पक्की पुल निर्माणका लागि शिलान्यास गरेका हुन् ।
उनले डुडुवा गाउँपालिकाका टेपरी–चौफेरी जोड्ने ९० मिटर, नौरीगौडी–कैरातीपूर्वा जोड्ने ५० मिटर, राजारामपूर्वा–हल्कारापूर्वा जोड्ने ४५ मिटर र मोल्हुपूर्वा अमराहवा–लडियाघाट जोड्ने ४५ मिटर लामो पुल निर्माणको शिलान्यास गरे ।
डुडुवा–१ मा आयोजित शिलान्यास समारोहलाई सम्बोधन गर्दै उनले जनतालाई आवागमनमा सहजता प्रदान गर्न सरकारले सडक र पुलको निर्माणलाई प्राथमिकतामा राखेको बताए । सानो समयमा पनि सरकारले देशका विभिन्न स्थानमा सयौँ पुल र सडकका योजनाहरू सुरु गरेको प्रष्ट पार्दै उनले केही वर्षमा ती योजना पूरा हुँदा हजारौँ जनताले सुविधा पाउने बताए ।
उनले डिजाइन एण्ड बिल्ड प्रक्रियाबाट पुल निर्माण गर्न टेण्डर आह्वान गरिसकेको जनाउँदै पुल सम्बन्धी सबै काम एकै कम्पनीले गर्ने बताए ।मन्त्री राईले अब विकासको राजनीति गर्नुपर्ने बेला भएकोसमेत बताएका छन् । राजनीतिको नाममा धर्म र साम्प्रदायिकता भड्काउन उद्दत राजनीतिक दल तथा नेताहरूलाई उनले जनताको मन जित्नका लागि विकास र समृद्धिको राजनीति गर्न सुझाव दिएका हुन् ।
उनले भने ‘अब धर्म र साप्रदायिकताको राजनीति छोड्नुस् । सक्नुहुन्छ भने विकास र समृद्धिको राजनीति गर्नुस् र जनताको मन जित्नुस् ।’ चुनावका बेला आमनागरिकलाई भ्रममा पार्न र साम्प्रदायिकता भड्काउने गतिविधिहरू बढेको भन्दा त्यस्ता क्रियाकलाप गर्नेहरूबाट सचेत हुन पनि उनले आग्रह गरे ।
‘यो क्षेत्रबाट धेरैले राजनीति गरे । धेरै नेता भए, सांसद भए । मन्त्रीहरू पनि भए । मन्त्रीमात्रै होइन यही बाँके जिल्लाबाटै राजनीति गर्नेहरू प्रधानमन्त्री पनि भए,’ उनले भने ‘तर बाँकेवासीले विकास कहिल्यै पाउन सकेनन् । प्रधानमन्त्री भएको जिल्ला पनि विकासमा सधैं पछि नै रह्यो ।’
उनले जिल्लामा विकासका अझै तमाम कामहरू अधुरा रहेका र तीनलाई पूरा गर्नका लागि आफू फेरि एकपटक चुनावमा होमिने पनि बताए । तर त्यसबाट अत्तालिएकाहरूले आफूविरूद्ध भ्रम छर्न धर्म र साम्प्रदायिकता भड्काउन खोजेको भन्दै उनले मिलेर बसेको समाजलाई भत्काउने कोसिस नगर्न पनि चेतावनी दिए ।
‘यो सबै समुदाय, सबै जातजाति र धर्म अनि सप्रदाय मिलेर बसेको समाज हो,’ उनले भने, ‘यसलाई बिथोल्ने प्रयास नगर्दा हुन्छ । धर्म र समुदाय बिथोलेर अब राजनीति चल्दैन । राजनीति गर्ने भए आउनुस् विकासका काममा प्रतिष्पर्धा गरौं। अब विकास र समृद्धिको राजनीति गरौं ।’ केही दिनदेखि गृह जिल्लाको भ्रमणमा रहेका मन्त्री राई विभिन्न कार्यक्रममा सहभागी भएर सोमबार काठमाडौँ फर्किएका छन् ।
सत्यपाटी । बाँके ।