बाँकेको नरैनापुर गाउँपालिकामा खडेरीका कारण रोपाइँ नभएपछि कृषि विज्ञले वैकल्पिक बाली लगाउन सुझाव दिएका छन् ।
विज्ञसहितको सल्लाहमा किसानका लागि मुख्य गरी कोशेबाली लगाउन भनिएको नरैनापुर गाउँपालिकाले जनाएको छ ।
नरैनापुरलाई सुख्खाग्रस्त क्षेत्र घोषणा गरिएको छ । त्यहाँ १५ प्रतिशत मात्रै धान खेती भएको छ । रोपिएको धान पनि पानी नपर्दा सुकेको छ ।
अब गहुँखेती गर्नुअगाडि कोशेबाली सम्भव भएकाले त्यस्ता बाली लगाउन सुझाव दिइएको गाउँपालिकाको कृषि शाखाका प्रमुख सदन भण्डारीले जानकारी दिए ।
कृषि ज्ञान केन्द्र, बाँकेका प्रमुख सागर ढकालका अनुसार सुख्खा क्षेत्रमा पानी कम भए पनि खेती हुने, छोटो अवधिको मासखेती गर्न किसानलाई सुझाव दिइएको छ ।
यसबाहेक कोशेबाली खेतीको रुपमा तेलहन बाली अर्थात तोरी खेती पनि गर्न सकिन्छ । किसानले नगदे बालीको रुपमा बन्दागोभी पनि लगाउन सक्ने विज्ञले बताएका छन् ।
नरैनापुरमा झण्डै ९० प्रतिशत क्षेत्रमा धानखेती हुने गरेकोमा यसपाली खडेरी परेपछि रोपाइँ हुन सकेन । नरैनापुरमा चार हजार २०० हेक्टर क्षेत्रफलमा धान खेती हुने गरेको थियो ।
अहिले रोपाइँ भएकोमध्ये पनि आधाजसो धान पानी नपाएर मर्ने अवस्थामा पुगेको छ । पालिकामा २६० हेक्टरमा सिँचाइ छ, तर पानीको स्रोतसमेत सुकेकाले समस्या भएको छ ।
अबका दिनमा कृषिका पूर्वाधार बढाउने, डिपबोरिङ्गका योजना बनाएर काम गर्ने र पुराना संरचनालाई मर्मत गर्ने कृषि शाखाका प्रमुख भण्डारीले बताए ।
यसअघि सुक्खा क्षेत्रको अवस्थाबारे बुझ्न कृषि अनुसन्धान निर्देशनालय, खजुराका कृषि वैज्ञानिक रामदास चौधरी, कृषि ज्ञान केन्द्र, बाँकेका प्रमुख ढकाल, बागवानी अधिकृत रामप्रसाद यादव र किसान–२, परियोजनाका टुकनारायण अर्यालसहितको टोलीले स्थलगत अवलोकन गरेको थियो ।
सत्यपाटी । बाँके ।