सडक निर्माणका क्रममा साढे २१ लाख भ्रष्टाचार गरेको आरोपमा हुम्लाको अदानचुली गाउँपालिकाका निमित्त कार्यकारी अधिकृत टेकदत्त प्याकुरेलसहित चार जनाविरुद्ध मुद्दा दायर भएको छ ।
अख्तियार दुरुपयोग अनुसन्धान आयोगले प्याकुरेलसहित इन्जिनियर मकरध्वज शाही र असिस्टेन्ट सब–इन्जिनियर विनोद थापा र ठेकेदार गणेश भण्डारीविरुद्ध आज विशेष अदालतमा मुद्दा दायर गरेको हो ।
कर्मचारी र ठेकेदारको मिलेमतोमा अदानचुली वडा नं.१ स्थित थलाल्नादेखि कल्खेसम्म र वडा नं.४ स्थित लौठीदेखि रिल्म हुँदै बिगोठीसम्मको सडक निर्माणमा सरकारलाई हानी नोक्सानी पुर्याइ भ्रष्टाचार गरेको अख्तियारका प्रवक्ता श्यामप्रसाद भण्डारीले जानकारी दिए ।
कर्मचारीहरूलाई भ्रष्टाचार भएको रकम २१ लाख ४७ हजार ४९२ रूपैयाँ बिगो कायम गरी कैद र बिगो अनुसार जरिबानासहित बिगो असुल गर्न मागदाबी लिइएको अख्तियारका प्रवक्ता भण्डारीले बताए ।
उनीहरूले वास्तविक फिल्डमा भएको कामभन्दा बढी, नभए नगरेको काम देखाइ बदनियतपूर्वक गलत नापी किताब, अन्तिम बिल र कार्य सम्पन्न प्रतिवेदन तयार गर्ने, पेश गर्ने र स्वीकृतिका लागि सिफारिश गरी भ्रष्टाचार गरेको अख्तियारको ठहर छ ।
ठेकेदार भण्डारीले भने आफूले गैरकानूनी लाभ लिने र गाउँपालिकालाई हानी पु¥याउन वास्तविक कामभन्दा बढी भुक्तानी लिएकाले २१ लाख ४७ हजार ४९२ रूपैयाँ बिगो कायम गरी जफत हुन र कैद वा बिगोबमोजिम जरिवाना गर्न मागदाबी अख्तियारले लिएको छ ।
यसैबीच, मुगुमा पर्यटन पदमार्ग अनियमितता गर्ने तत्कालीन वन अधिकृतसहित ६ जनाविरुद्ध भ्रष्टाचारको मुद्दा दर्ता भएको छ । ६ लाख ३२ हजार ६७७ रूपैयाँको अनियमितता भएको भन्दै अख्तियारले भ्रष्टाचारको मुद्दा दर्ता गरेको हो ।
मुगुका तत्कालीन डिभिजनल वन अधिकृत भरतबहादुर बुढा थापा, सब–इन्जिनियर गोरसिंह बडुवाल, असिष्टेन्ट सब–इन्जिनियर हिमालकुमार मल्ल, उपभोक्ता समितिका अध्यक्ष मानबहादुर शाही, सचिव धमेन्द्र शाही र कोषाध्यक्ष कुशुमदेवी शाहीविरुद्ध मुद्दा दर्ता भएको हो ।
कर्णाली प्रदेश सरकारमार्फत आर्थिक वर्ष २०७६–०७७ मा छाँयानाथ रारा नगरपालिका–७ टोप्ला गाउँमा पर्यटन पदमार्गका लागि विनियोजित बजेटमा अनियमितता भएको भन्दै अख्तियारले भ्रष्टाचारको मुद्दा दर्ता गरेको हो । कर्मचारी र उपभोक्ता समितिका पदाधिकारीबाट भ्रष्टाचार भएको रकम बराबरको बिगो कायम गरी असुल गर्न र कैद र जरिबानासमेत अख्तियारले मागदाबी गरेको छ ।
सत्यपाटी । काठमाडौं ।