यो वर्षको मनसुन केही दिनमा सुरु हुने भएको छ । १० जुन अगाडि नै मनसुन सुरु हुनसक्ने जल तथा मौसम विज्ञान विभागले जनाएको छ ।
सामान्यतया नेपालमा औसतमा १३ जुनमा मनसुन सुरु हुन्छ । तर, यो पटक केही अगाडि नै मनसुन नेपाल भित्रिने मौसमविद् हीरा भट्टराईले जानकारी दिए ।
उनका अनुसार अहिले मनसुन भारतको चेन्नेइ क्रस भइसकेको छ । उक्त मनसुन विस्तारै नेपाल प्रवेश गर्नेछ । “हामी मौसमी प्रणाली अध्ययन गरिरहेका छौं । केही दिन अगाडि नै हामी यसबारे जानकारी दिने छौं,” मौसमविद् भट्टराईले भने ।
हाल नेपालमा स्थानीय वायु र भारतको उत्तर प्रदेशदेखि पूर्वी बंगलादेशसम्म पूर्व–पश्चिम फैलिएको न्यूनचापीय रेखाको प्रभाव रहेको विभागले जनाएको छ ।
स्थानीय वायुको प्रभाव रहेको मौसमी प्रणालीमा कुनै पनि समय मौसममा बदली भएर हावाहुरी तथा चट्याङसहित क्षणिक वर्षा हुन्छ । यो मौसमी प्रणालीमा लामो समय पानी पर्दैन ।
मनसुन सुरु भएपछि भने लामो समय देशका धेरै स्थानमा झरी पर्छ । झरी पर्दा खोला तथा नदीमा पानीको बहाव बढ्ने तथा बाढी आउने हुन्छ ।
प्रायः हरेक वर्ष मनसुनमा आउने बाढी तथा तराई क्षेत्रमा हुने डुबानले ठूलो परिमाणमा धनजनको क्षति हुने गरेको छ ।
यसवर्ष धेरै वर्षा हुने
यसपटक नेपालमा विगत वर्षको तुलनामा धेरै वर्षा हुनेछ । विशेषगरी पूर्वी नेपालमा यो वर्ष भारी वर्षा हुने सम्भावना रहेको छ ।
“दक्षिण एसियाको क्षेत्रीय सम्मेलन साफकोपले यो वर्ष विगत वर्षको तुलनामा धेरै वर्षा हुने त्यसमा पनि पूर्वी नेपालमा धेरै पानी पर्ने प्रक्षेपण गरेको छ,” मौसमविद् भट्टराई भन्छन् ।
सत्यपाटी । काठमाडौँ ।