कोडिभ–१९ महामारीलाई लक्षित गरी नेपालगन्जमा निर्माणाधीन एक हजार शैय्या क्षमताको होल्डिङ सेन्टर निर्माणको काम अन्तिम चरणमा पुगेको छ ।

उपमहानगर पालिकाको वडा नम्बर १४ भवानीयापुरमा तीव्र गतिमा निर्माण भइरहेको सो होल्डिङ सेन्टरको निर्माण कार्य अन्तिम चरणमा पुगेको र केही दिनभित्रै पूरा हुने जनाइएको छ ।

जिल्ला प्रशासन कार्यालय बाँकेका प्रशासकीय अधिकृत रामकुमार सोनकरका अनुसार होल्डिङ सेन्टरमा २२ वटा भवन, भान्साघर, खाने पानीको ट्याङ्कीसहित शौचालय भवनहरू चार बिघा आठ कठ्ठामा निर्माण गरिएका छन् ।

कोरोना महामारीको समयमा भारतबाट आउनेलाई राख्ने गरी होल्डिङ सेन्टर तयार गरिएको भए पनि महामारी नरहेकाले अब आपतविपतमा आश्रयस्थलका रूपमा सो स्थानलाई प्रयोग गर्न सक्ने गरी तयार गरिने अधिकृत सोनकरको भनाइ छ ।

भारतबाट आउने कोभिड–१९ सङ्क्रमितलाई व्यवस्थित रूपमा आइसोलेसनमा राख्ने र आवश्यक परेमा औषधि उपचार गर्ने सुविधासहितको अस्थायी अस्पतालका रूपमा प्रयोग गर्ने उद्देश्यले नेपाली सेनाले नेपालगन्ज नाकामा उक्त होल्डिङ सेन्टर निर्माण सुरु गरेको थियो ।

२०७७ असोज २६ गतेसम्म निर्माण सम्पन्न गर्ने गरी २९ करोड ३८ लाख रुपैयाँमा श्री हनुमान कन्स्ट्रक्सन, हेटौँडाले एक हजार शैय्या क्षमताको होल्डिङ सेन्टर निर्माणको ठेक्का लिएको थियो । निर्माण कार्य अन्तिम चरणमा पुगेकाले अब फिनिसिङ, पाइपलाइन अन्डर ग्राउन्ड गर्ने कार्य मात्र बाँकी रहेको जनाइएको छ ।

जिल्ला प्रशासन कार्यालयका प्रशासकीय अधिकृत सोनकरले निर्माणको करिब ९६ प्रतिशत काम पूरा भएको बताए । कोरोना महामारी समाप्त हुँदै गएकाले अब सो होल्डिङ सेन्टरलाई विभिन्न प्रकारका दैवी प्रकोप र आपतविपतमा आश्रयस्थलका रूपमा प्रयोग गर्ने गरी तयारी भइरहेको स्वास्थ्य कार्यालय बाँकेका अधिकृत नरेश श्रेष्ठले बताए ।

उनले कुनै पनि प्रकारको विपतमा उक्त सेन्टरको उपयोग गरिने सहमतिसमेत बनेको बताए । यसैबीच लुम्बिनी प्रदेश स्वास्थ्य, जनसङ्ख्या तथा परिवार कल्याण मन्त्रालयका सचिव डा.विकास देवकोटाले सो होल्डिङ सेन्टरको स्थलगत अनुगमन गरेर निर्माण कार्यको जानकारी लिएका छन् । सो अवसरमा उनले छिटो काम पूरा गरेर तयारी अवस्थामा राख्न निर्देशन दिए ।