नेपालगन्ज उपमहानगरपालिका वडा नम्बर १२ को वडाअध्यक्षमा तरुणकुमार बज्राचार्य निर्वाचित भएका छन् । भेरी प्राविधिक शिक्षालय नेपालगन्जमा भएको मतगणनाको परिणामबाट उनी निर्वाचित भएका हुन् ।

मत गणनाको अन्तिम परिणाम केहीबेरमा औपचारिक रुपमा घोषणा गरिदैछ ।  यसअघि २०७४ सालको निर्वाचनमा पनि उक्त वडामा नेपाली कांग्रेसले जितेको थियो । त्यसबेला बज्राचार्य वडा सदस्यमा निर्वाचित भएका थिए । बज्राचार्यको जितसँगै कांग्रेसले आफ्नो विरासत जोगाएको छ ।

यसपटक उक्त वडाबाट नेपाली कांग्रेसबाट बज्राचार्यसहित नेकपा एमालेका तर्फबाट हेमराज गौतम, नेकपा माओवादी केन्द्रको तर्फबाट तिरथराम चिडिमार, जनता समाजवादी पार्टी(जसपा)बाट बुद्धिसागर सुवेदी, राप्रपाबाट ध्रुवराज वर्मा वडाअध्यक्षको उम्मेदवार थिए ।

निर्वतमान वडाअध्यक्ष समेत रहेका सुवेदीले यसपटक कांग्रेसबाट वडाअध्यक्षको टिकट पाएनन् । कांग्रेसबाट टिकट नपाएको झोकमा उनी जसपामा प्रवेश गरी रातारात वडाअध्यक्षको टिकट फुत्काउन सफल भएका थिए ।