बाँकेको कोहलपुरमा माओवादी केन्द्रले बिजयी सुरुवात गरेको छ । कोहलपुर वडा नं. १ मा माओवादीको सिङ्गो प्यानल नै बिजयी भएको छ । शनिबार राती सम्पन्न मतगणना अनुसार वडाध्यक्षमा माओवादीका बद्रिप्रसाद जैसी बिजयी भएका छन् ।

खसेको कुल १ हजार ९९० मतमध्ये जैसीले ७२४ मत प्राप्त गरेका छन् । उनका निकटतम प्रतिद्धन्दी एमालेका रुद्र खनालले ६४८ तथा काँग्रेसका उम्मेदवारले ४४८ मत प्राप्त गरेका छन् ।

बिजयी जैसीको प्यानलबाट महिला सदस्यले ७३४, दलित महिला सदस्यले ७३८ र दुई जना खुला सदस्यले क्रमशः ७३४ र ७२० मत प्राप्त गरी विजयी भएका हुन् । गत स्थानीय तह निर्वाचनमा कोहलपुर १ मा एमालेका उम्मेदवार विजयी भएका थिए ।

त्यसैगरी मेयरमा समेत माओवादीका नरेन्द्र न्यौपानेले अगाडी देखिएका छन् । कोहलपुर–१ बाट न्यौपानेले ९२५ मत प्राप्त गरेका छन् भने एमालेका खिलप्रसाद भुषालले ५२० तथा काँग्रेसका पूर्णप्रसाद आचार्यले ४१५ मत प्राप्त गरेका छन् ।

उपमेयरमा एमालेकी अश्मिता चौधरी अगाडी देखिएकी छन् । चौधरीले ६०८ मत प्राप्त गरेकी छन् भने गठबन्धनकी उम्मेदवार नारायणी ओलीले ५३८ तथा काँग्रेसकी उम्मेदवार संगिता सुवेदीले ४६७ मत प्राप्त गरेकी छन् । अहिले वडा नं.१५ को मतगणना भइरहेको छ ।