नेपाली कांग्रेसका तर्फबाट राप्तीसोनारी गाउँपालिकाको अध्यक्ष पदका उम्मेदवार तप्त बहादुर पौडेलले घरदैलोका क्रममा गाउँपालिकाबासीले देखाएको माया, सद्भाव र विश्वास देखेर आफूहरुले चुनाव जितिसकेको बताउनुभएको छ ।

राप्तीसोनारी गाउँपालिका वडा नम्बर २ मा आज आयोजित बृहत् कोणसभालाई सम्बोधन गर्दै पौडेलले भन्नुभयो, “१४ गतेदेखि हामी निरन्तर घरदैलोमा छौं, यहाँका स्थानीयहरुले हामी पुग्दा जुन माया, स्नेह, सद्भाव र विश्वास देखाउनुभएको छ, त्यो हेर्दा हामीले चुनाव जितिसकेका छौं, हामीले अध्यक्ष, उपाध्यक्षसहित ९ वटै वडा जित्छौं ।”

पौडेलले आफूहरुप्रतिको अगाढ विश्वास अब मतपत्रमा बदलिन मात्र बाँकी रहेको बताउनुभयो । उपाध्यक्षकी उम्मेदवार मनिषासिंह थारुले गाउँपालिकाबासीले कांग्रेसलाई ठूलो भरोसा गरिरहेकाले राप्तीसोनारीमा फेरि पनि कांग्रेसले जित्ने उद्घोष गर्नुभयो ।

पालिका सभापति भिम बहादुर राना क्षेत्रीले राप्तीसोनारीबासीले यसअघि कांग्रेसलाई जिताएर सेवा गर्ने मौका दिएको र त्यो मौकालाई कांग्रेसले राम्रोसंग निभाएको भन्दै अपूरा कामहरु पूरा गर्न फेरि कांग्रेसलाई नै जिताउने मुडमा रहेको बताउनुभयो ।

कोणसभालाई वडा नम्बर २ का वडा अध्यक्ष पदका उम्मेदवार तुलाराम खत्रीले पनि सम्बोधन गर्दै वडाबासीको हितका खातिर आफू प्रतिबद्ध भएर लाग्ने बताउनुभयो ।