बाँके जिल्लाका अधिकांश वडामा स्थानीय तहको निर्वाचनको रौनक बढ्दै गए पनि नेपालगन्ज उपमहानगरसँगै जोडिएको डुडुवा गाउँपालिका–६, हिरमिनियामा बसोबास गर्दै आएका मगन्ता समुदायलाई भने निर्वाचनले छोएको छैन ।

निर्वाचनभन्दा पनि कसरी साँझ–बिहानको छाकको जोहो गर्ने भन्ने चिन्ताले मगन्ता समुदायलाई पिरोलिरहेको सो समुदायका अगुवा रमेश मगन्ताले बताए । उनले दिनभर माग्न नजाने हो भने बेलुका के खाने र बालबालिकालाई के खुवाउने भन्ने चिन्ताले निर्वाचन आएको थाहै नपाएको बताए ।

मगन्ता समुदायका अर्का अगुवा शोभाराम मगन्ताले आफूहरूको पेसा नै दिनभर मागेर गुजारा टारेको जनाउँदै सोही पेसाकै आधारमा थरसमेत ‘मगन्ता’ भएको बताए । उनले कहिलेकाहीँ केही मानिस भोट माग्न आफ्नो बस्तीमा आउने गरेको जनाउँदै तर उनीहरूका कुरा सुन्ने फुर्सद कसैलाई नहुँदा त्यसै फर्किने गरेको पनि बताए ।

आफ्नो र परिवारको पेट कसरी भर्ने भन्ने चिन्ता लिएर घरघर माग्न जानुपर्ने बाध्यताले निर्वाचन वा अन्य कुनै चाडपर्वले समेत महत्व नपाएको शोभारामको भनाइ छ । अर्का मगन्ता दीपकले यसअघि केही वर्ष पहिले केही मानिस भोट माग्न आएका र मगन्तालाई यो गर्छु, त्यो गर्छु भने र गएकामा हालसम्म फर्किएर मुख नदेखाएको दुःखेसो गरे ।

उनले निर्वाचन लड्नेलाई बाहेक यहाँ धेरैलाई निर्वाचनबारे खासै चासो नरहेको देखिएको पनि बताए । दीपकका अनुसार राजनीतिमा चासो नराख्ने मगन्ता समुदायलाई निर्वाचन आएका बेला नेताहरू भने विभिन्न आश्वासन दिन पुग्छन् तर पछि कोही पनि फर्केर हेर्नसमेत आउँदैनन् ।

बाँकेको हिरमिनियामा ६० र आसपासका अन्य स्थानमा गरी करिब ३५० परिवार मगन्ता समुदायको बसोबास छ । बर्दियामा ३०० को हाराहारीमा मगन्ता छन् । बाँके र बर्दिया दुई जिल्लामा गरी करिब तीन हजार उनीहरूको जनसङ्ख्या रहेको छ । तैपनि मगन्ताहरूले अझै आफ्नो परम्परागत पेसाकै रूपमा अपनाउँदै आएको माग्ने कार्यलाई छोड्न सकेका छैनन् ।