डोटी जिल्ला शिखर नगरपालिका वडामा ११ मल्लीसातमा रहेको भगवती आधारभूत विद्यालयमा विद्यार्थी खुला चौरमा घुलोसँगै परीक्षा दिन बाध्य भएका छन् । विद्यालयमा नर्सरीदेखि कक्षा ३ सम्मका विद्यार्थी खुला चौरमा भुइँमै बसेर परिक्षा दिइरहेका हुन् ।

विद्यालयमा कक्षा ४ देखि कक्षा ८ सम्मका ५० प्रतिशत विद्यार्थी पनि प्रयाप्त डेस्क नहुँदा खुट्टामै पपेर राखेर परीक्षा दिन बाध्य रहेको विद्यालयका शिक्षक रमेश बोहराले जनाए । उक्त विद्यालयमा मल्लीसात, किमाडा र ओलिगाउँका विद्यार्थी अध्ययनरत रहेका छन् ।

अहिले विद्यालयमा वार्षिक परिक्षा चलिरहेको छ । नेताहरु चुनावलक्षित कार्यक्रम गर्दा विद्यालयको स्तरोन्नतिका लागि सकारात्मक कदम चाल्ने मिठो आश्वासन दिए पनि चुनावपछि विद्यालयको शिक्षा, गुणस्तरियता सम्बन्धी ध्यान नै दिँनैनन् ।

शिखर नगरपालिकाको वडा नं.११ मा माध्यमिक तहको विद्यालय नभएकाले सोही विद्यालयलाई मावि बनाउने भन्दै शिखर नगरपालिकाका प्रमुख सिताराम जोशीले आशवासन दिँदै आए पनि ५ वर्ष कार्यकाल वितिसक्दा समेत नगरपालिकाले विद्यालयका लागि सिन्को समेत नभाँचेको स्थानीयहरु बताउँछन् ।

८ कक्षा पास भइसकेपछि विद्यार्थी सिताराम उच्च माध्यमिक विद्यालय उच्चाकोट तथा भगवती माध्यमिक विद्यालय तलारामा जानुपर्ने कठिक अवस्था रहेको विद्यालय ब्यवस्थापन समितिका अध्यक्ष कर्णसिंह विष्टले जानकारी दिए ।

साँझ विहानको एकछाकको लागि भौतारिरहेको स्थानियले महंगो शुल्कमा भाडामा र होस्टेलमा बाहिरी बिद्यालयमा आफ्ना छोरा छोरीहरुलाई अध्ययन गराउन नसक्दा छोरीको विवाह र छोरालाई छिमेकी राष्ट्र भारतमा रोजगारीमा पठाउनुपर्ने बाध्यता रहेको छ ।

अहिले उक्त गाउँका ५० प्रतिशतभन्दा बढी युवा गाउँमा रहेको विद्यालयमा ८ पास गरी भारत जाने गरेका छन् । युवालाई स्वदेशमै सिर्जनात्मक तालिम दिएर उद्यमी बनाउनु त परको कुरा नगरपालिकाले विद्यालयको स्तरोन्नतिमा समेत ध्यान दिएन ।

भगवती आधारभूत विद्यालयमा विद्यालयको आर्थिक अवस्था कमजोर भएकाले निजी श्रोतका शिक्षकलाई तलब प्रदान गर्न तथा विद्यालयको भौतिक विकासका लागि होली खेलेर रकम संकलन गर्दे आइरहेको स्थानीय गणेश रावल जानकारी दिए ।

भगवती आधारभूत विद्यालयमा नर्सरीदेखि ८ कक्षासम्म पठनपाठन हुँदै आएको छ । २०३७ सालमा स्थापना भएको विद्यालयमा करिब ३०० विद्यार्थी छन् । विद्यालयमा ३ स्थायी शिक्षक, २ राहत शिक्षक, १ जना बालविकास सहजकर्ता र ३ जना निजी शिक्षक गरी ९ जना शिक्षक कार्यरत छन् ।