पूर्वमन्त्री तथा बाँके क्षेत्र नं.२ का सांसद मोहम्मद ईश्तियाक राईले धम्बोझी उच्च माध्यमिक विद्यालयलाई जिल्लाकै नमुना विद्यालय बनाउनुपर्नेमा जोड दिएका छन् । उनले गर्न चाहेमा सरकारी विद्यालयले पनि निजीभन्दा राम्रो नतिजा दिनसक्छ भन्ने कुरा यो विद्यालयले प्रमाणित गरिदिएको बताए ।

राष्ट्रपति शैक्षिक सुधार कार्यक्रम अन्तर्गत सो विद्यालयमा निर्माण गर्न लागिएको चार कोठे भवनको आइतवार शिलन्यास गर्दै पूर्वमन्त्री राईले सो बताएका हुन् । उनले नेपालगन्जकै सबैभन्दा उत्कृष्ट सरकारी विद्यालयको रुपमा रहेको यो विद्यालयमा कक्षा कोठा निर्माण र शिक्षक दरबन्दी बढाउन तीनवटै तहको सरकारले ध्यान दिनुपर्ने बताए ।

उनले विगतमा आफ्नो संसदीय कोषबाट यस विद्यालयलाई ५० लाख रुपैयाँ प्रदान गरेको जनाउँदै भविष्यमा पनि सहयोग गरिराख्ने बताए । कार्यक्रममा विद्यालय व्यवस्थापन समितिका सदस्य भगवती शाह, कपास विकास समितिका अध्यक्ष हेमन्त काफ्ले, यज्ञबहादुर बस्नेत, धनबहादुर चन्द र अमिर अहमद लगायत शिक्षक र अभिभावकको उपस्थिति थियो ।

चालु आर्थिक वर्षभित्र निर्माण पुरा गरिसक्नुपर्ने गरी राष्ट्रपति शैक्षिक सुधार कार्यक्रम अन्तर्गत चार कोठे भवनको निर्माण शुरु भएको हो । उच्च माविमा करिब २ हजार ३०० विद्यार्थी रहेका छन् भने ५५ जना शिक्षक र कर्मचारी छन् । उक्त माविमा मानविकी, व्यवस्थापन, कानुन र शिक्षा संकायको पढाई हुने गरेको छ । सो अवसरमा विद्यालयको अवस्था, विद्यार्थिको चाप र कक्षा कोठाको अभावका बारेमा विद्यालय व्यवस्थापन समितिका अध्यक्ष लिलाराज उपाध्यायले कार्यपत्र प्रस्तुत गरेका थिए ।

कार्यपत्रमा विद्यालयमा विद्यार्थीको चाप अत्याधिक रहेको र कक्षा कोठाको अभावसँगै भएका कोठा र भवनसमेत जीर्ण भैसकेकोले रंगरोगन र मर्मत सम्भारको आवश्यकता समेत औंल्याइएको छ । उक्त अवसरमा उच्च माविका प्रधानाध्यापक वामदेव सुवेदी, स्थानीय कर्णबहादुर मल्ल लगायतले पनि विद्यालयको भौतिक पूर्वाधारमा सम्बन्धित निकायको ध्यानाकर्षण गराएका थिए ।