सत्ता साझेदार पाँच दलको मंगलबार बेलुका केन्द्रमा बसेको बैठकले एमालेबाट स्थानीय तहका जनप्रतिनिधि एकीकृत समाजवादी पार्टीमा प्रवेश गरेका ठाउँमा अन्य दलले उम्मेदवार नउठाउने सहमति गर्यो । सो सहमतिपछि एकीकृत समाजवादी पार्टीका नेताहरु खुसी भएका छन् ।

सो पार्टीले एमाले छाडेर आफ्नो पार्टीमा आएका जिल्ला भरीका जनप्रतिनिधिहरुको विवरण संकलन गरिरहेको छ । एकीकृत समाजवादी जिल्ला कमिटी उपसचिव गणेश बोहरा नेतृत्वको टोलीले एमालेबाट आएका जनप्रतिनिधिको नामावली तयार पारिरहेका छन् ।

गाउँपालिका अध्यक्ष, उपाध्यक्ष, वडाध्यक्ष, कार्यपालिका सदस्य, वडासदस्य समेत गरि करिब ४४ जना भन्दा बढी जनप्रतिनिधि आफ्नो पार्टीमा खुलेको जिल्ला कमिटी उपसचिव बोहराले दाबी गरेका छन् । उनले भने, ‘खुल्ने क्रम जारी छ । अहिलेसम्म सबै पालिकाको अन्तिम विवरण जिल्लामा आइसकेको छैन ।’

तर, एमालेले जितेका १ नगरपालिका ७ वटा गाउँपालिका गरी ८ स्थानीय तहका प्रमुख/अध्यक्षमध्ये २ जना मात्रै एकीकृत समाजवादीमा खुलेका छन् । बझाङका १२ वटै पालिकाका एकीकृत समाजवादीका नेताहरुसँग सम्पर्क गरेर पाएको जानकारी अनुसार केदारस्युँ गाउँपालिका र छविसपाथिभेरा गाउँपालिकाका प्रमुख/अध्यक्ष, उपप्रमुख/उपाअध्यक्ष एमालेबाट समाजवादीतिर खुलेका छन् ।

अन्य पालिकाका जनप्रतिनिधीहरु एकीकृत समाजवादीमा खुलेका छैनन् । केदारस्युँ गाउँपालिकाका ४ केदारस्यु गाउँपालिकाका ४ र थलारा गाउँपालिकाबाट १ जना वडाध्यक्ष समाजवादीमा खुलेका छन् । यस हिसाबले मंगलबार भएको केन्द्रको सहमति पालना भए बझाङमा २ स्थानीय तह एकीकृत समाजवादीको भागमा पर्ने पक्का भएको छ ।

अन्य स्थानको हकमा संगठन र अहिलेको अवस्थालाई हेरेर गठबन्धनले बाँडफाँट गर्ने भएका छन् । जिल्लामा सोहि सहमती पालना गरेर अगाढी बढ्न दलहरु लागिपरे पनि केदारस्युँ गाउँपालिकामा एकीकृत समाजवादीको उम्मेदवार उठाएर छविसपाथिभेरा गाउँपालिकामा आफ्नो पार्टीको उम्मेदवार उठाउनुपर्ने नेकपा माओवादी केन्द्रले अडान लिएको छ ।

केदारस्युँ गाउँपालिकाका जनप्रतिनिधीहरुले पार्टी विभाजनको बेला एकीकृत समाजवादीमा पार्टीमा सनाखत गरेको भए पनि छविसपाथिभेरा गाउँपालिकाका जनप्रतिनिधीहरुले सनाखत नगरेको र पछिल्लो समयमा समाजवादीमा देखिएकाले उक्त पालिका आफुले पाउनुपर्ने माओवादी केन्द्रले धारणा राखेको हो । एकीकृत समाजवादीले एक नगरपालिकासहित चार पालिका आफूले पाउनुपर्ने प्रस्ताव गठबन्धनमा राखेको छ ।