प्रहरी नायव उपरीक्षक (डीएसपी) रमेश सिंहमाथि सरकारी कागजात कीर्ते गरेर प्रहरी सेवामा प्रवेश गरेको आरोप पुष्टि भएको छ । विशेष अदालतले डीएसपी सिंहलाई दोषी ठहर गरेको हो ।

विशेष अदालतका न्यायाधीश श्रीकान्त पौडेल, शालिग्राम कोइराला र बलभद्र बाँस्तोलाको इजलासले सिंहलाई गत चैत २७ गते आइतबार उनलाई दोषी ठहर गरेको हो । सिंहलाई सजाय भने तोक्न बाँकी रहेको छ ।

सिंहले जन्ममिति सच्याएर सेवा प्रवेश गर्दै निरन्तरता दिएको भन्दै अख्तियारले भ्रष्टाचार निवारण ऐन २०५९ विपरित काम गरेको भन्दै मुद्दा दायर गरेको थियो । उक्त मुद्दामा उनी दोषी ठहर भएका हुन् ।

२०५८ मंसिरमा प्रहरी निरीक्षक पदमा भर्नाका लागि आवेदन खुला भएको थियो । त्यो बेला रमेश सिंहले पनि प्रहरी निरीक्षकमा भर्ना हुनका लागि आवेदन दिए । सशस्त्र द्वन्द्वको समय थियो ।

२०५८ सालमा परीक्षा दिएका परीक्षार्थीको नतिजा लोक सेवा आयोगले २०६१ सालमा नतिजा प्रकाशित गरेको थियो । आवेदन दिएकामध्ये ८४ जना परीक्षार्थी उत्तीर्ण भएका थिए । तीमध्ये एक थिए, रमेश सिंह ।

उनै रमेश सिंह २०६१ जेठ १५ गतेबाट प्रहरी निरीक्षकमा सेवा प्रवेश गरेका थिए । बझाङको श्री शान्ति माध्यमिक विद्यालय चौघानपाटाबाट २०४८ सालमा एसएलसी उत्तीर्ण गरेका थिए । सिंहको एसएलसीको सिम्बोल नम्बर ०७०००५४ (बी) हो ।

एसएसलीको लब्धांकपत्र अनुसार उनको उमेर त्यसबेला २६ वर्ष भइसकेको थियो । लब्धांकपत्रमा उनको जन्ममिति २०३२ माघ १२ गते थियो । प्रहरीमा आवेदन खुलेको बेला उनी २५ वर्ष ११ महिनाको भइसकेका थिए । प्रहरी नियमावली अनुसार आवेदन खुलेको मितिमा २५ वर्ष ननाघेको व्यक्तिले मात्रै आवेदन दिन मिल्ने व्यवस्था रहेको छ ।