मकवानपुर प्रहरीले विभिन्न प्रकारका लागुऔषधसहित ६ जनालाई पक्राउ गरेको छ । प्रहरीले मकवानपुरको छुट्टाछुट्टै स्थानबाट विभिन्न प्रकारको लागुऔषधसहित ६ जनालाई पक्राउ गरेको हो ।

लागुऔषध ढुवानी भइरहेको सूचनाका आधारमा इलाका प्रहरी कार्यालय मनहरीबाट प्रहरी निरीक्षक प्रकाश थापाको कमाण्डमा खटिएको प्रहरी टोलीले ३५ किलोग्राम गाँजासहित ५ जनालाई नियन्त्रणमा लिएको छ ।

जिल्ला प्रहरी कार्यालय मकवानपुरका अनुसार चितवनबाट हेटौंडातर्फ आउँदै गरेको बा.८ ख ८१०६ नम्बरको यात्रुवाहक बसलाई पूर्व–पश्चिम राजमार्गअन्तर्गत मनहरी–६ बाट रोकी जाँच गर्दा चितवन जिल्लाको राप्ती नगरपालिका–१ का १९ वर्षीय सरोज तामाङ, राप्ती नगरपालिका–११ का २५ वर्षीय सूर्यबहादुर स्याङ्बो, २८ वर्षीय होमनाथ मुक्तान, २५ वर्षीय यमराज मुक्तान र ३४ वर्षीय एबीलाल तामाङलाई लागुऔषधसहित पक्राउ गरिएको प्रहरीले जनाएको छ ।

प्रहरीले हेटौंडा–७ नागस्वतीस्थित २२ वर्षीय सन्देश ब्लोनको घरबाट ठूलो परिमाणमा लागुऔषध बरामद गरेको छ । ब्लोनको घरमा छापा मार्दा लागुऔषध ट्रमा १ हजार ४० ट्याब्लेट, नाइट्रोभेट ५२५ ट्याब्लेट र मोरेक्स १० बोतल बरामद भएको जिल्ला प्रहरी कार्यालय मकवानपुरले जनाएको छ । प्रहरीले बरामद गरेको लागुऔषधको परिमाण हेर्दा सन्देशको घर लागुऔषधको अड्डा (जक्सन) नै रहेको पुष्टि हुने जनाएको छ ।