बाँकेको नरैनापुर साक्षर गाउँपालिका घोषणा भएको छ।

आज विशेष कार्यक्रमको आयोजना गरेर नरैनापुरलाई साक्षर गाउँपालिका घोषणा गरिएको गाउँपालिकाका प्रमूख प्रशासकीय अधिकृत भरत बस्नेतले जानकारी दिए ।

कार्यक्रमका प्रमुख अतिथि जिल्ला समन्वय समिति बाकेका संयोजक अजय श्रीवास्तवले नरैनापुर गाउपालिकाका अध्यक्ष इश्तियाक अहमद शाहलाई साक्षर घोषणाको प्रमाणपत्र हस्तान्तरण गर्दै साक्षर भएको घोषणा गर्नुभएको हो ।

त्यसैगरी, अतिथीहरु शिक्षा बिकाश तथा समन्वय इकाई बाँकेका प्रमुख रामसुरेश यादव, वडा नम्बर १ का अध्यक्ष मोल्हे बेहना, २ का मसुद अहमद शाह, ३ का राजकुमार मौर्य, ४ का दिनेशप्रसाद शर्मा, ५ का कृष्णचन्द्र मौर्य ६ का बिरेन्द्र पाल सिंह, नेकपा एमालेका गाउपालिका अध्यक्ष सोहनलाल यादव लगायत रहनुभएको थियो ।

बाँकेमा स्थानीय तहहरुमा नरैनापुर साक्षर घोषणा गर्ने छैटौं स्थानीय तह हो । बाँकेका आठ वटा स्थानीय तहमध्ये पाँच वटा यसअघि साक्षर घोषणा भैसकेका छन् । कोहलपुर, खजुरा, जानकी, राप्तीसोनारी, बैजनाथ गाउँपालिका साक्षर घोषणा भैसकेका छन् ।

यसअघि, गाउँपालिकालाई साक्षर बनाउन लागि गाउँपालिकाले ६ वटै वडामा विशेष साक्षर कक्षा सञ्चालन गरेको थियो ।

नरैनापुरमा ९ हजार ५१८ जना निरक्षरका लागि साक्षरता कक्षा सञ्चालन गरिएको गाउँपालिकाका शिक्षा शाखा प्रमुख कृष्णकुमार थारुले जानकारी दिनुभयाे । गत पुसमै साक्षर गाउँपालिका घोषणा गर्ने तयारी भए पनि प्राविधिक कारणले केही ढिलाइ भएको शिक्षा शाखा प्रमुख थारुले जानकारी दिए ।

साक्षर घोषणा गर्ने स्थानीय तहलाई सरकारले पुरस्कृतसमेत गर्दै आएको छ । साक्षर गाउँपालिका घोषणा गर्न १५ देखि ६० वर्ष उमेरका ९० प्रतिशत मानिस साक्षर हुनुपर्छ ।

बाँकेमा नेपालगन्ज उपमहानगरपालिका र डुडुवा गाउँपालिका मात्रै साक्षर घोषणा हुन बाँकी रहेका छन् ।