नेपाली कांग्रेस बाँकेले पूर्व पार्टी सभापति एवम् पूर्व प्रधानमन्त्री स्वर्गीय गिरिजाप्रसाद कोइरालाको १२औं स्मृति दिवसमा पार्टी कार्यालयमा विचार गोष्ठी गरेर कोइरालालाई सम्झिएको छ ।

जिल्ला सभापति नारायण प्रसाद गौडेलको सभापतित्व एवम् राष्ट्रियसभा सदस्य युवराज शर्माको प्रमुख आतिथ्यतामा आयोजित विचारगोष्ठीमा बोल्ने बक्ताहरुले कोइराला नेपाली राजनीतिका शिखर पुरुष भएको चर्चा गर्दै उनकै नेतृत्वमा नेपालमा शान्ति स्थापना भएकाले कोइराला शान्ति नायक भएको बताए ।

विषम् परिस्थितिबाट मुलुकलाई निकास दिन अहम् भूमिका खेलेको बताउँदै बक्ताहरुले स्वर्गीय कोइराला नेपाली राजनीतिका अनुकरणीय व्यक्तित्व भएको उल्लेख गरे ।

विचारगोष्ठीमा प्रमुख अतिथि शर्मा, पार्टी सभापति गौडेल, निवर्तमान सभापति किरण कोइराला, कांग्रेस लुम्बिनी प्रदेशबाट बाँकेमा खटिएकी प्रदेश क्षेत्रीय प्रतिनिधि जानुका केसी, लुम्बिनी प्रदेश कमिटी सदस्य कृष्णा सापकोटा चौधरी, संविधानसभा सदस्य अब्दुल हमिद सिद्दिकी, महासमिति सदस्य गौरा भट्टराई, क्षेत्र नम्बर १ का क्षेत्रीय सभापति पोषण केसी, २ का सभापति रमेश कुमार गुप्ता, नेपालगञ्ज नगर सभापति प्रशान्त विष्ट, खजुरा गाउँपलिका सभापति रमेश सिजाली र प्रेस युनियन बाँकेका अध्यक्ष अर्जुन ओलीले २०६२÷६३ को जनआन्दोलन मार्फत् संसद् पुनःस्थापना गराउन, बृहत् शान्ति सम्झौता मार्फत् माओवादी सशस्त्र युद्धको अन्त्य गराउन र संविधानसभाको निर्वाचनमार्फत् सङ्घीय लोकतान्त्रिक गणतन्त्र सुनिश्चित गर्न कोइरालाले अगुवाई गरेको स्मरण गरेका थिए ।

जिल्ला उपसभापति कृष्ण बहादुर कार्कीले स्वागत मन्तब्य व्यक्त गरेको कार्यक्रमको सञ्चालन सहसचिव विनोद कुमार थारुले गरेका थिए ।

राणाशासनकै बेला विराटनगर जुटमिलमा मजदुर आन्दोलनको अगुवाइ गरेर राजनीतिमा होमिएका कोइराला पाँच पटकसम्म प्रधानमन्त्री बनेका थिए । २०५३ सालमा नेपाली कांग्रेसको सभापतिमा चुनिएका कोइराला तीन कार्यकालसम्म कांग्रेसको सभापति रहे ।

२०६२/६३ को जनआन्दोलन मार्फत् संसद् पुनःस्थापना गराउन, बृहत् शान्ति सम्झौता मार्फत् माओवादी सशस्त्र युद्धको अन्त्य गराउन र संविधान सभाको निर्वाचनमार्फत् सङ्घीय लोकतान्त्रिक गणतन्त्र सुनिश्चित गर्न कोइरालाले अगुवाई गरेका थिए ।

२०६३ साल जेठ ४ गतेको प्रतिनिधिसभा घोषणापछि कोइरालाले अन्तरिम राष्ट्रप्रमुखको भूमिका समेत निर्वाह गरेका थिए । कोइरालालाई शान्ति प्रक्रिया र संविधान निर्माण प्रक्रियाका सुत्राधार मानिन्छ ।

उनकै नेतृत्वमा २०६५ जेठ १५ गते नेपालबाट २४० वर्षको इतिहास बोकेको शाह वंशीय राजसंस्थाको अन्त्य भई नेपाल सङ्घीय लोकतान्त्रिक गणतन्त्रका रूपमा स्थापित भएको थियो । कोइरालाको २०६६ साल चैत ७ गते निधन भएको थियो ।

नेपालमा शान्ति स्थापनाका लागि कोइरालाले पुर्याएको योगदानको स्मरण गर्दै आज नेपाली कांग्रेस, यसका भ्रातृ एवम् शुभेच्छुक संस्थाले विविध कार्यक्रम गरी कोइरालाको १२औँ स्मृति दिवस मनाएका छन् ।