रुसमा केही समय अगाडिदेखि मात्र लागु भएको एउटा कठोर स्वतन्त्र प्रेसविरोधी कानुन पश्चात् त्यहाँका धेरै सञ्चारकर्मीहरू देश छाडेर गइसकेका छन्, जसमा अन्तर्राष्ट्रिय मिडिया सीएनएन र न्युयोर्क टाइम्सका पत्रकारहरू छन् ।

तर न्यु टाइम्स म्यागजिनकी प्रमुख सम्पादक वरिष्ठ रुसी सञ्चारकर्मी येभजेनिया एल्बेट्सले चाहिँ रुसमै बस्ने निर्णय गरिन् । सीएनएनसँगको कुराकानीमा उनले आफू रुस प्रशासनसँग नडराउने बताएकी छन् ।

उनी भन्छिन्, ‘म कुनै सहिद होइन । तर पनि कसैले त केही गर्नैपर्छ जस्तो लाग्यो ।’ उनकाअनुसार अहिलेसम्म १६० उत्कृष्ट रिर्पोटरहरू रुसबाट बाहिरिसकेका छन् । एल्बेट्सले आफ्ना युट्युब च्यानलमा पनि विभिन्न खबरहरू पोस्ट गर्ने गरेकी छन् जुन ‘फेक न्युज’ कानुनको उल्लंघन हुन सक्ने हुँदा उनलाई सजिलै जेल सजायँ दिलाउन सक्छ ।

तर, एक अत्यन्तै अनुभवी सञ्चारकर्मी भएको हुँदा जेलबाट बच्दै उनले होसियारिपूर्वक रिर्पोटिङ गरिरहेको बताइन् । सरकारसँग डराएर बस्न अब धेरै ढिला भइसकेको उनी बताउँछिन् । ‘हो उनीहरूले मलाई मार्न सक्छन् । तर मलाई कसैले पनि म सँधै बाँचिरहनेछु भन्ने बाचा गरेको छैन । एक न एक दिन सबैलाई मर्नु नै छ,’ उनले भनिन् ।

यसअघि अन्तर्राष्ट्रिय पुरस्कारप्राप्त अमेरिकी सञ्चारकर्मी बेन्ट रेनोड रुसी बलको हमलामा मारिएका थिए । अधिकारीहरूका अनुसार रुसी फौजको गोली लागेर उनको मृत्यु भएको हो । यसरी अहिले डर चिन्ता भन्दा पनि उनलाई आफ्नै देशसँग एकदमै लाज लागेको एल्बेट्स बताउँछिन् । आफू बच्चैदेखि छिमेकी युक्रेनमा घुम्न गइरहने गर्दै आएकाले पनि यस घटनाले भित्रैबाट दुःखी बनाएको उनले बताइन् ।

उनका अनुसार रुसका धेरै विज्ञहरूले यस्तै महसुस गरिरहेका छन् । उनी भन्छिन्, ‘मलाई एकदम लाज लागिरहेको छ कि मैले तिरिरहेको सबै कर युक्रेनका मानिसहरूलाई मार्न बनाइएको बममा प्रयोग भइरहेको छ । त्यसैले मलाई अहिले घुँडा टेकेर माफी माग्न मन छ । मेरो देशले यस्तो गरिरहेको प्रति म युक्रेनलाई हृदयदेखि क्षमा माग्न चाहन्छु ।’