काठमाडौं । नेकपा माओवादी केन्द्र निकट योङ्ग कम्युनिष्ट लिग (वाइसीएल) नेपालका केन्द्रीय स्वास्थ्य विभाग प्रमुख सुभाष पौडेलको दुर्घटनामा परि निधन भएको छ ।

पौडेल हिजो फागुन १३ गते पुतलीबजारमा वाइसीएल नेपाल स्याङ्ग्जाको जिल्ला समितिको बैठक सकेर साँझ करिब ६ बजेतिर पोखरा फर्किँदै गर्दा भालु पहाडमा दुर्घटनामा परेका थिए ।

मोटरसाइकलमा एक्लै गइरहेको बेला दुर्घटनामा परेका पौडेल भीरबाट खसेको भए पनि घटनाबारे तत्कालै कसैलाई खबर भएको थिएन । वाइसीएल जिल्ला नेता तिलक रुचालका अनुसार अन्य कोही व्यक्ति उनीसँग नभएको हुँदा पौडेलका बारेमा हिजोदेखि कुनै खबर प्राप्त हुन सकेको थिएन ।

अहिले इन्सपेक्टर पदम थापा नेतृत्वको टोली घटनास्थलमा पुगेको छ । थापाका अनुसार, हिजो साँझ साढे पाँच बजेतिर पुतलीबजारबाट पोखरा जाने क्रममा भालु पहाडको सडक बिस्तार भइरहेको खण्डमा चिप्लिएर मोटरसाइकल दुर्घटना भएको हो । ‘कच्ची बाटो र पानी परेको बेला भएकोले सडक दुर्घटना नै देखिन्छ,’ थापाले भने ।

प्रहरीले मुचुल्का उठाएर शवलाई पोष्टमार्टमका लागि अस्पताल लिएको छ । थापाका अनुसार, पौडेलको शव सडकबाट १५० मिटर तल चट्टानमा अडकिएको अवस्थामा फेला परेको छ भने उनी चढेका बाइक त्यो भन्दा ५० मिटर तल खसेको छ । पौडेल फेदीखोला गाउँपालिका निवास हुन् ।