सिन्धुली । झट्ट हेर्दा पुरानो जर्मन ट्रक जस्तो । बायाँ साइडमा दुईवटा ठूला सोलार प्यानल जडित छ । त्यसको चार्ज गर्न ढोकाको साइडमा ठूलो इन्भर्टर राखिएको छ । जसलाई ताला लगाइएको छ । पछाडि अक्सिजन सिलिण्डर, अगाडि हुटमा त्रिपालले छोपिएको छ । बाहिरी बनोट हेर्दा नै यो चानचुने गाडी होइन भन्ने अनुमान सहजै लगाउन सकिन्छ ।

मोडीफाइ गरेर हाइफाई सुविधासहितको मिनीट्रक यतिखेर जिल्ला प्रहरी कार्यालय सिन्धुलीको प्राङ्गणमा छ । यो मिनी ट्रक लागूऔषध सहित प्रहरीले पक्राउ गरेको युट्युबर चेतन कार्कीको हो । यो मिनी ट्रकमा सबैखाले सुविधा छ । प्रहरीका अनुसार चालक बस्ने भन्दा पछाडिको भागलाई सुविधा सम्पन्न घर जस्तै बनाइएको छ ।

बायाँ साइडबाट ढोका खुलेपछि भित्र हेर्दा झन् अनौठो लाग्छ । सुत्ने बेडदेखि भान्साका सबै सामग्री ट्रकमा सेट गरिएको छ । घुमाउने कुर्सीसहित कार्यालय सजावटसमेत गरिएको छ । ट्रकभित्र पनि यस्तो सुविधा हुन्छ भनेर प्रहरी नै अचम्मित भएका थिए । प्रहरीका अनुसार शौचालयसमेत मिनी ट्रकभित्रै छ ।

जिल्ला प्रहरी कार्यालय सिन्धुलीका प्रवक्ता एवं प्रहरी नायव उपरीक्षक मनोजकुमार लामाले भने, ‘मिनी ट्रक मोडीफाइ गरेर सबैखाले सुविधासहित विलासी सामान राखिएका छन् । हामीलाई सूचना प्राप्त भएको थियो । नियमित चेकजाँचकै क्रममा गाडीसमेत अनौठो लागेर थप अनुसन्धान गरियो । लागूऔषध फेला पर्यो ।’

संगीतका लागि गितारदेखि खाने काजु किसमिससमेत सबै मिनी ट्रकभित्र पाइएको उनले बताए । विदेसतिर यस्तो ट्रकलाई क्याम्पट भनिने प्रहरी नायव उपरीक्षक लामाले सुनाए । चल्तीका युट्यूबर भएकाले लागूऔषधसहित समाइएका कार्कीलाई खुर्कोटमा नै फ्यानहरूले घेरेको समेत प्रहरीले जनाएको छ ।

बीपी राजमार्ग अन्तर्गत सिन्धुलीको गोलन्जोर गाउँपालिका वडा नं. ७ को खुर्कोटमा लागूऔषध सहित काठमाडौं महानगरपालिका २६ सामाखुसीका ३७ वर्षीय युट्यूबर कार्कीलाई खैरो हेरोइन ४ दशमलव १३० ग्राम र ६ दशमलव ९३० ग्राम गाँजासहित पक्राउ गरिएको प्रहरी नायव उपरीक्षक लामाले बताए ।

बर्दिबासबाट धुलीखेलतर्फ जाँदै गरेका युटु्यूबर कार्कीले चलाएको चेतनभ्लग आवरणको ०१–००३क ९१८२ नं को मिनी ट्रक चेकजाँच गर्दा कार्कीले लगाएको ट्र्याकसुटको दाहिने खल्तीबाट खैरो हेरोइन र गाँजा बरामद भएको प्रहरीले जनाएको छ । युट्यूबर कार्कीलाई लागूऔषध मुद्दामा शुक्रबार सिन्धुली अदालतबाट ७ दिनको म्याद थपी थप अनुसन्धान भइरहेको प्रनाउ लामाले बताए ।

मिनीट्रकको कागजात र मोडीफाइ गर्ने इजाजत भए नभएको समेत अनुसन्धान भइरहेको प्रहरीले जनाएको छ । युट्युबरको आवरणमा लागूऔषध, सुन र अन्य तस्करीका कारोबार बीपी राजमार्गलाई ट्रान्जिट प्वाइन्ट बनाएर बाक्लै भइरहेको सूचना प्राप्त गरेकाले थप कडाई गरिएको प्रहरीले जनाएको छ । (ईकान्तिपुर)