बझाङ । न्यायाधीशसहित एक जना कर्मचारीलाई कोरोना संक्रमण देखिएपछि जिल्ला अदालत बझाङले अत्यावश्यक सेवाबाहेक अन्य सेवा बन्द गरेको छ । सेवाग्राही र अन्य कर्मचारीलाई कोरोना सर्ने जोखिम बढेपछि जिल्ला अदालत बझाङले अत्यावश्यक बाहेकका सेवा बन्द गरेको हो ।

स्वास्थ्य परीक्षण गर्दा जिल्ला न्यायाधीश लगायत कर्मचारीलाई विहिबार कोरोना संक्रमण पुष्टि भएको थियो । कार्यालयले विहिबार सूचना प्रकाशन गरेर माघ १४ गतेसम्मका लागि अतिआवश्यक बाहेकका सेवा बन्द गरेको जनाएको छ । संक्रमण नियन्त्रणमा नआए थप केहीदिन सेवा रोकिने पनि बताइएको छ ।

अदालतका कर्मचारीहरूका अनुसार जिल्ला अदालत बझाङबाट हद म्याद सकिने फिराद पत्र, उजुरी, प्रतिउत्तर पत्र तथा अभियोग दर्ता, प्रतिवादीको बयान, थुनछेक आदेश, पक्राउ पुर्जी तथा पक्राउ पुर्जी स्वीकृति, हिरासत निगरानी कक्षमा राख्ने अनुमतिको आदेश दिने तारिख लिने लगायतका सेवा मात्र प्रवाह हुने भएका छन् ।