काठमाडौं । सहिद स्मारक ‘ए’ डिभिजन लिग अन्तर्गत आजदेखि सातौं चरणका खेलहरु सुरु हुँदैछन् ।

दुई विभागीय टोली सशत्र प्रहरीको एपीएफ क्लब र त्रिभुवन आर्मी क्लबबीच दिउँसो १ बजे खेल हुनेछ भने फ्रेन्ड्स क्लब र न्युरोड टिम एनआरटीबीचको खेल दिउँसो पौने ५ बजे सुरु हुनेछ ।

दुवै खेल त्रिपुरेश्वरस्थित दशरथ रंगशालमा हुनेछन् । ११ औं स्थानमा रहेको एपीएफलाई रेलिगेसनको डर अझै रहेको छ । त्यसैले आर्मीलाई हराउँदै एपीएफ अंक तालिका सुधार गर्न चाहन्छ ।

तर, बलियो आर्मीविरुद्ध एपीएफलाई जित निकाल्न कठिन हुनेछ । चौंथो स्थानमा रहेको आर्मी एपीएफलाई हराए। शीर्ष तीन भित्र उक्लने दाउमा रहेको छ ।

पुछारमा रहेको फ्रेन्ड्स जारी लिगमा जित निकाल्न नसक्ने एक्लो टिम हो । तर, आज एनआरटीलाई हराएर फ्रेन्ड्स पहिलो जित निकाल्न चाहन्छ ।

यसैगरी, आठौं स्थानमा रहेको एनआरटी फ्रेन्ड्सलाई हराएर अंक तालिका सुधार गर्न चाहन्छ ।