काठमाडौं । रुकुम ( पश्चिम ) मा बस दुर्घटना भइ मृत्यु भएका एक जना व्यक्तिको प्रहरीले मंगलबार सनाखत गरेको छ ।

सोमबार जिल्लाको मुसिकोट नगरपालिका–२ स्थित रातामाटा भन्ने स्थानमा रा १ ख २१०९ नम्बरको बस दुर्घटना हुँदा एक जनाको मृत्यु भएको थियो भने ३८ जना घाइते भएका थिए ।

डिएसपी ध्रुवकुमार श्रेष्ठका अनुसार मृत्यु हुनेमा सोही नगरपालिका–१ का ६५ वर्षीय बुधुराम खड्का रहेका छन् । उनलाई उपचार गर्न लैजाने क्रममा बाटो मै मृत्यु भएको श्रेष्ठले बताए । घाइतेहरू मध्ये १५ जना डिस्चार्ज भइसकेका छन् ।

मंगलबार बिहान सम्म २१ जना घाइतेहरूले जिल्ला मै उपचार भइरहेको छ । दुई जनालाई हेलिकप्टरमार्फत काठमाडौँ र नेपालगञ्ज  पठाइएको छ ।  फरार बस चालकको खोजी भई रहेको प्रहरीले जनाएको छ ।

यसैबीच दाङमा एक जना पुरुष मृत फेला परेका छन् । तुलसीपुर उपमहानगरपालिका–७ जितपुर बस्ने ५० वर्षीय यज्ञ मूर्ति आचार्य घरदेखि करिब २ किलोमिटर टाढा खेतमा मृत फेला परेका हुन् ।

बजार जान्छु भनी घरबाट हिँडेका उनको शव उक्त स्थानमा फेला परेको प्रहरीले जनाएको छ ।