काठमाडौं । नेपाली फुटबल टिमका मुख्य प्रशिक्षक अब्दुल्लाह अल्मुताइरी थप तीन वर्षे सम्झौता गर्न सहमत भएका छन् ।

उनले यसबारे सामाजिक सञ्जालमार्फत जानकारी दिएका छन् । ’कर्मा छिरिङ शेर्पा (एन्फा अध्यक्ष) सँगको भेटपछि मैले नयाँ सम्झौता गर्ने निर्णय गरेको छु । एन्फा र कतार फुटबल संघलाई धन्यवाद दिन चाहन्छु,’ उनले लेखेका छन् । यस्तै अलमुताइरीले आफुले चाडै दुई वर्षको योजना र लक्ष्य सार्वजनिक गर्ने बताएका छन् । उनले सम्झौता एक वर्ष बाँकी रहदै नवीकरण गरेका हुन्।

‘हामी चाडै आगामी दुई वर्षको लक्ष्य र योजना सार्वजनिक गर्ने छौँ । नेपालको फुटबलको भविष्य राम्रो हुने तर आफूहरुलाई त्यसका लागि समय चाहिन्छ,’ उनले लेखेका छन्, ‘नेपाली समर्थकको माया मलाई मात्र नभएर खेलाडीहरुलाई पनि चाहिएको छ ।

हामीलाई सहयोग गर्नुहोस र हामीमा विश्वास गर्नुहोस ।’ कुवेती प्रशिक्षक अलमुताइरीले नेपाललाई पहिलो पटक साफ च्याम्पियनसिपको फाइनलमा पुर्राएका थिए ।

माल्दिभ्समा दुई साता अघि सम्पन्न साफको फाइनलमा नेपाल भारतसँग ३(० ले पराजित भएको थियो । उपाधि जित्न नसकेपनि नेपाल पहिलो पटक साफको उपविजेता बनेको हो ।

तर, फाइनल अघि प्रशिक्षक अलमुताइरीले फाइनल खेल नेपालको लागि आफ्नो अन्तिम खेल भएको बताएका थिए । अलमुताइरी माल्दिभ्सबाटै कुवेत फर्किएका थिए ।