काठमाडौं । नेपाल राष्ट्र बैंकले विहीबार दुई हजार करोड अर्थात् २० अर्ब रुपैयाँ बराबरको रिपो जारी गरेको छ ।

हालको बैंकिङ्ग तरलता (लगानी योग्य रकम) को समस्यालाई मध्यनजर गर्दै बैंकले सर्टट्रम लोनका रुपमा ‘क’, ‘ख’ र ‘ग’ वर्गका बैंकहरुका लागि यस्तो रिपो जारी गरेको हो ।

कर्जा चाहने बैंकहरुले उचित धितोसहित बैंकको वेभसाइटमा उपलब्ध लिंकमा गएर रिपोका लागि आवेदन दिन सक्नेछन् ।

रिपो म्याचुरिटी अर्थात् बैंकहरुले कर्जा परिचालन गर्न पाउने मिति प्रस्तावित रिपो निष्काशनको मितिले एक हप्ता (भाद्र २४ गते) सम्म रहने राष्ट्र बैंकले जनाएको छ ।

के हो रिपो ?
बैंकिङ प्रणालीमा साधारण प्रकृतिको न्यून तरलताको स्थिति देखिएमा केन्द्रीय बैंकले छोटो अवधिका लागि (अधिकतम ७ दिन) तरलता प्रवाह गर्न बैंकहरुलाई कर्जा प्रस्ताव गर्ने गर्छ ।

यसमा इच्छुक बैंकहरुले आफुले दिन सक्ने ब्याजदरसहित कर्जाका लागि प्रस्ताव गर्छन् । र राष्ट्र बैंकले ब्याजदर हेरेर सबैभन्दा बढी ब्याज प्रस्ताव गर्ने बैंकबाट क्रमश रिपो वितरण गर्छ । यसैलाई रिपो भनिन्छ ।

त्यसो त केन्द्रीय बैंकले रिपो मात्र जारी गर्दैन यसैको ठीक उल्टो रिभर्स रिपो समेत जारी गर्ने गर्छ । रिभर्स रिपो अर्थात् बजारमा अधिकतम तरलता कायम भई कर्जा प्रवाहमा समस्या भएमा केन्द्रीय बैंकले सोही प्रक्रियाअनुसार रिभर्स रिपो उठाउने गर्छ । यसमा बैंकहरुले सीमित ब्याज प्राप्त गर्छन् ।