बाँके ।  बाँकेको कोहलपुरमा युवाका दुई समूहबीच खुकुरी हानाहान भएको छ । नेपालगञ्ज मेडिकल कलेज शिक्षण अस्पताल कोहलपुर नजिकै आइतबार दिउँसो १२ बजेतिर दुई समूहबीच खुकुरी हानाहान भएको हो ।

खुकुरी प्रहारबाट एक युवा घाइते भएको ईलाका प्रहरी कार्यालय कोहलपुरले जनाएको छ । ईलाका प्रहरी कार्यालय कोहलपुरका ईन्र्चाज समेत रहेका प्रहरी नायव उपरिक्षक रबिन्द्र खनालले सो घटनामा बिनय चन्दले खुकुरी प्रहार गरी प्रदीप रानालाई घाइते बनाएको बताए । खुकुरी प्रहारबाट प्रदीपको शरिरका विभिन्न भागमा गम्भीर चोट लागेको छ ।

घाइते रानाको कोहलपुर मेडिकल कलेज कोहलपुरमा उपचार भइरहेको र अवस्था मध्याम रहेको प्रहरीले जनाएको छ । खुकुरी प्रहारबाट अर्का एकजना समेत सामान्य घाइते भएको बताइएको छ ।

प्रहरी नायव उपरिक्षक खनालका अनुसार केहीदिन पहिला प्रदीपले विनयलाई ठाडो किन हेरेको भन्दै कुटपिट गरेको र मिलापत्र गरेकोमा पुन आइतबार दिउसो बिनयले प्रदीपमाथि आक्रमण गरेको हो ।

घटनास्थलमा पुगेको कोहलपुर प्रहरीले घटनास्थलबाट एक थान खुकुरीको दाप समेत बरामद गरेको छ । घटनापछि फरार बिनयको प्रहरीले खोजी गरिरहेको जनाएको छ ।