बाँके । नेपाल आयल निगम लिमिटेडले नेपालगन्जमा आफ्नै पेट्रोल पम्प सञ्चालनको तयारी अन्तिम चरणमा पुर्याएको छ । झण्डै तीन करोड रुपैयाँको लागतमा ‘केमिकल फोम’सहितको अत्याधुनिक पेट्रोल पम्प निर्माण कार्य अन्तिम चरणमा पुगेको निगमले जनाएको छ ।
निगमका अनुसार नेपालगन्जमा सञ्चालनको तयारीमा रहेको पेट्रोल पम्प मुलुककै पहिलो आधुनिक पेट्रोल पम्प हुनेछ । पूर्ण स्वचालित प्रविधिको पम्प असोजभित्रै सञ्चालनमा ल्याउने आयल निगमको तयारी छ । पेट्रोल पम्पको अन्डरग्राउण्डमा पनि हालसम्मकै धेरै १.०७ लाख लिटर तेल अटाउने पाँचवटा ट्यांकी राखिनेछ ।
पम्प परिसरमा बैंकको एटीएम सेन्टर र डेबिट क्रेटिड कार्ड ‘स्वाइप’ गर्ने मेसिनसमेत जडान हुनेछ । ‘स्वाइप’ मेसिन जडानपछि उपभोक्ता डेबिट क्रेटिड कार्डको प्रयोग गरेर आफैँले तेल भर्ने सुविधा लिन पाउनेछन् । पश्चिम नेपालकै नमूनाका रुपमा निर्माण हुने पम्प निगमको आफ्नै ११ कठ्ठा जग्गामा पेट्रोल पम्प निर्माण भइरहेको छ ।
पेट्रोल पम्प सञ्चालनमा आएपछि सवारी चालकले सवारी साधनमा इन्धन भर्ने क्रममा सवारी धनीलाई जालझेल गरेर ठग्न पाउने छैनन् । अत्याधुनिक पेट्रोल पम्पमा तेल भर्नका लागि अत्याधुनिक डिस्पेन्सिङ्ग जडान हुने निगमले जनाएको छ । अत्याधुनिक पेट्रोल पम्पमा निर्माणका लागि गत भदौंमा ठेक्का सम्झौता भएको थियो ।
निगमका अनुसार सवारी साधनमा इन्धन भर्दा सवारी चालकलाई अनिवार्य बील दिइने र इन्धन कति मात्रामा भरेको जानकारी सवारी धनीको मोवाइल नम्बरमा सवारी साधनको नम्बरसहितको म्यासेज (एसएमएस) इन्धन भर्ने बित्तिकै सवारी धनीको मोवाइलमा पुग्ने हुँदा चालकले सवारी धनीलाई जालझेल र ठगी गर्न पाउने छैनन् ।
अत्याधुनिक पेट्रोल पम्पको हाताभित्रै सवारी साधन मर्मतका लागि वर्कसप, कफिसप र अत्याधुनिक शौचालय निर्माण अन्तिम चरणमा पुगेको पनि निगमले जनाएको छ । पेट्रोल पम्पभित्रका बन्ने भवन तथा संरचनाहरुमा अत्याधुनिक एसी जडान गरी वातानुकुलित बनाइएको पनि आयल निगमले जनाएको छ ।
अत्याधुनिक सफ्वेयर जडान गरिएको पेट्रोल पम्प नेपालगन्ज उपमहानगरपालिका–१० मा निर्माण सम्पन्न हुँदैछ । निगमले पम्प सञ्चालनमा ल्याएपछि नीजि पेट्रोल पम्पहरुबाट इन्धन भर्ने परिमाण नपुग्ने, इन्धनको शुद्धता लगायतका समस्याबाट उपभोक्ताले मुक्ति पाउनेछन् भने नीजि क्षेत्रका पम्पहरुलाई पनि स्तरोन्नती गर्नुपर्ने दवाव र चुनौति बढ्नेछ ।
।