काठमाडौं । काठमाडौंको आजको न्यूनतम तापक्रम ७.८ डिग्री सेल्सियस रहेको छ ।
विहान ६ः३० बजे काठमाडौंको तापक्रम ७.८ डिग्री सेल्सियस मापन गरिएको जल तथा मौसम विज्ञान विभागले जनाएको छ ।
दिउँसो काठमाडौंको मौसम सफा रहने र तापक्रम २० डिग्री सेल्सियसको सेरोफेरोमा रहने मौसमविद् वरुण पौडेलले जानकारी दिए ।
“आज काठमाडौंसहित यहाँबाट पूर्वको मौसम सफा रहने छ भने काठमाडौंबाट पश्च्चिमको मौसम बदली रहने छ,” मौसमविद् पौडेलले भने ।
आज विहान सुदूरपश्चिम प्रदेशमा र अन्य केही पहाडी भू–भागमा आंशिक बदली रहेको छ भने बांकी भू–भागमा मौसम सामान्यतया सफा रहेको उनले बताए ।
आज दिउँसो देशभर आंशिकदेखि सामान्य बदली रही उच्च पहाडी तथा हिमाली भू–भागका केही स्थानमा हल्का हिमपातको सम्भावना रहेको विभागले जनाएको छ ।
आज राति देशभर आंशिकदेखि सामान्य बदली रहनेछ । उच्च पहाडी तथा हिमाली भू–भागका केही स्थानमा हल्का हिमपातको सम्भावना रहेको विभागको भनाइ छ ।
।