बाँके । नेपालगन्ज उपमहानगरपालिकाका सरसफाई अधिकृत अशोक केसीको निधन भएको छ । केही दिनअघि मोटरसाइकल दुर्घटनामा परि गम्भीर घाइते भएका सरसफाई अधिकृत केसीको उपचारका क्रममा निधन भएको हो ।

बाँकेको राझाँ नजिक मोटरसाईकल दुर्घटनामा परि टाउकोमा गम्भीर चोट लागि घाइते भएका केसीको नेपालगन्ज उपमहानगरपालिकामा उपचार भइरहेको थियो । मेडिकल कलेजमा उपचाररत केसीको शुक्रबार राती मृत्यु भएको नेपालगन्ज उपमहानगरपालिकाले जनाएको छ ।

नेपालगन्ज उपमहानगरपालिकाका उपमेयर उमा थापामगरले सरसफाइ अधिकृत अशोक केसीको निधनप्रति गहिरो दुःख ब्यक्त गरेकी छन् । उनले भनिन्, ‘सरसफाई अधिकृत केसीप्रति गहिरो दुःख ब्यक्त गर्दछु । उहाँको निधनले उपमहानगरपालिकाले ईमान्दार, लगनशील राष्ट्रसेवक कर्मचारी गुमाएको छ । उहाँको आत्माले शान्ति पाओस्, शोक सन्तप्त परिवारमा धैर्य धारण गर्ने शक्ति प्राप्त होस् ।’

नेपालगन्ज उपमहानगरपालिकाका सरसफाई अधिकृतको मृत्यु भएसंगै यतिबेला सिंगो उपमहानगरपालिका शोकमा रहेको छ । आज शनिबार भएका कारण उपमहानगरपालिकाले भोली आइतबार शोकसभा आयोजना गर्ने जनाएको छ । यसैबीच, सरसफाई अधिकृत केसीको आज (शनिबार) नै बाँकेको डुडुवा गाउँपालिकाको कम्दीस्थित सिधनिया घाटमा दाहसंस्कार गरिने भएको छ ।