काठमाडौं । तस्करी नियन्त्रण गर्ने क्रममा मारिएका प्रहरी सहायक निरीक्षक (असई) गोविन्द विक र प्रहरी जवान रामबहादुर साउँदका परिवारलाई सुदूरपश्चिम प्रदेश सरकारले २/२ लाख रुपैयाँ दिने भएको छ ।

बिहीवार बिहान मुख्यमन्त्री तथा मन्त्रिपरिषद् कार्यालयमा बसेको बैठकमा दुवै परिवारलाई २/२ लाख दिने निर्णय गरिएको प्रदेशका आर्थिक मामिला तथा योजना मन्त्री झपट बोहराले बताए ।

तस्करी नियन्त्रण गर्ने क्रममा तस्करद्वारा अस्थायी प्रहरी पोस्ट जुगेडाका प्रमुख समेत रहेका असई विक र प्रहरी जवान साउँदको हत्या गरिएको थियो ।

दुवैका परिवारलाई आर्थिक मामिला तथा योजना मन्त्री झपट बोहराले भेटेर राहतको लागि आश्वासन दिएका थिए । मन्त्री बोहराकै पहलमा प्रदेश सरकारले दुवै परिवारलाई २/२ लाख रुपैयाँ उपलब्ध गराउने निर्णय गरेको छ ।