काठमाडौं । विगतका वर्षहरुमा हिन्दू नेपालीहरुको महान चाड दशैंका बेला फिल्म क्षेत्रमा पनि व्यापक हल्लाखल्ला हुन्थ्यो । तर, यसपटक यो क्षेत्र सुनसान छ । मानिसको दैनिकी सामान्य अवस्थामा फर्किए पनि स्कूल र फिल्म क्षेत्रहरू भने बन्द गरिएका छन् ।

सरकारले गतवर्ष चैतको पहिलो सातादेखि फिल्म हल बन्द गर्ने निर्णय गरेदेखि फिल्म क्षेत्र पूर्ण रुपमा बन्द भएको छ । यी सात महिनामा कुनै पनि फिल्म रिलिज भएनन् । काम नसकिएका फिल्म पनि छायांकन हुन नसक्दा रोकिएका छन् । यदि कोरोना भाइरस महामारी हुँदैनथ्यो भने यतिबेला दशैं ताकेर प्रदर्शनको तयारीमा रहेका फिल्महरुबीच चर्को प्रतिस्पर्धा हुन्थ्यो ।

‘जात्रा’ निर्देशक प्रदीप भट्टराई, ‘कबड्डी’ निर्देशक रामबाबु गुरुङ, ‘छक्का पञ्जा’ टिमका दीपकराज गिरी लगायतले गतवर्ष नै आफ्ना फिल्म दशैंमा रिलिज गर्ने दाबी गरेका थिए । जबकि, यी मेकरका फिल्मले दर्शकबाट पनि राम्रो प्रतिक्रिया कमाएका छन् । यसपालिको बडादशैंमा फिल्मकर्मीबीच आफ्नो फिल्म रिलिज गर्ने प्रतिस्पर्धा हुन्थ्यो ।

तर, कोरोना महामारीका कारण कुनै फिल्म पनि छायांकनमा नै जान सकेका छैनन् । यो दशैंमा रिलिज हुने भनिएका फिल्म स्किृप्ट पनि पूरा नभई थन्किएका छन् । अनमोल केसी र सुहाना थापाको फिल्म ‘ए मेरो हजुर ४’ पनि दशैंमा नै रिलिज गरिने तयारी थियो । तर, फिल्मको पूर्ण छायांकन नसकिँदै नेपालमा लकडाउन गरियो ।

कोरोना महामारीका कारण फिल्मको बाँकी काम सकिएको छैन । झण्डै सात महिनादेखि बन्द रहेका फिल्म हल दशैंसम्म खुल्ने धेरै फिल्मकर्मीको अपेक्षा थियो । तर, दशैं त के अझै मंसिरसम्म पनि फिल्महरु यस्तै बन्द रहने हुन् कि भन्नेमा फिल्मकर्मी चिन्तित छन् । वर्षभरि प्रायः फिल्म फ्लप भए पनि दशैंमा रिलिज गरेका फिल्मले करोडौंको व्यापार गर्ने गर्थे ।

व्यापारको लोभले गर्दा पनि फिल्मकर्मीबीच दशैंमा फिल्म रिलिज गर्ने होडबाजी नै हुने गर्थ्यो । कोरोना भाइरसका कारण यसपटक भने फिल्म क्षेत्र पूर्णरुपमा सुनसान बनेको छ । फिल्मकर्मीहरु लामो समयदेखि कामविहीन बन्दै आइरहेका छन् ।