बाँके । बाँकेमा गएराती भएको सवारी दुर्घटनामा एक महिलासहित १२ जनाको मृत्यु भएको छ । दुर्घटनामा २१ जना घाइते भएका छन् । गाडीमा चालक र दुई सहचालकसमेत गरी ३३ जना सवार रहेका थिए । दुर्घटनामा ११ जनाको घटनास्थलमै मृत्यु भएको थियो भने एकजनाको भेरी अस्पताल नेपालगन्जमा उपचारका क्रममा मृत्यु भएको हो ।

भारतबाट आएका नागरिकहरुलाई लिएर नेपालगन्जको जमुनाहा नाकाबाट सल्यानतर्फ जाँदै गरेको ना ५ ख ५९९५ नम्बरको फोर्स गाडी राप्तीसोनारी गाउँपालिका–२ ठुरिया जङ्गलमा रोकिराखेको बा ४ ख ९०६४ नम्बरको ट्रकमा ठोक्किएर दुर्घटना भएको जिल्ला प्रहरी कार्यालय बाँकेका प्रहरी निरीक्षक हृदेश सापकोटाले जानकारी दिए ।

गएराती १२ बजे अगैया नजिकै ठुरिया जङ्गलमा सडक किनारमा रोकिराखेको ट्रकमा ठोक्किएको प्रहरीले जनाएको छ । घाइतेहरुलाई उपचारका लागि भेरी अस्पताल नेपालगन्ज ल्याइएको छ । उनीहरुमध्ये चार जना गम्भीर रहेको अस्पतालले जनाएको छ । मृत्यु भएका १२ जनाकै शव भेरी अस्पतालमा राखिएको छ । मृतक तथा घाइतेहरुको परिचय खुल्न सकेको छैन ।