फाइल तस्वीर

बाँके । बाँकेको नरैनापुरमा कोरोना संक्रमितलाई भगाउनेहरु सक्रिय भएको भन्दै गाउँपालिकाले सुरक्षाको माग गरेको छ । अत्याधिक संक्रमित भेटिएको यहाँका क्वारेन्टाइनको अव्यवथाले कोरोना विष्फोट हुने केन्द्र बन्ने खतरा देखिएको छ । प्रदेश पाँचको बाँकेमा रहेको सीमावर्ती गाउँ नरैनापुर नेपालमा कोरोना संक्रमित सबैभन्दा बढी हुने स्थानीय निकाय हो । भारतसँग सीमा जोडिएको र प्रदेशकै पनि पिछडिएको यस गाउँपालिकामा अहिलेसम्म ११४ जना कोरोना संक्रमित छन् । यहाँका क्वारेन्टाइनमा भारतबाट नेपाल भित्रिनेक्रम जारी छ । दिन दुगुना रात चौगुना मानिसहरु भित्रने क्रम जारी रहेकाले सिंगो बाँके जिल्ला नै प्रभावित भएको छ ।

भारतका महाराष्ट्र र दिल्लीबाट यहाँ मानिसहरु ओइरिरहेका छन् । ‘सुरक्षा, भौतिक पूर्वाधार तथा जनचेतनाको अभावका कारण स्थिति नियन्त्रणभन्दा बाहिर जाने भएकाले सम्बन्धित निकायमा जानकारी गराएका छौं,’ गाउँपालिकाका प्रशासकीय अधिकृत मणिराम खरालले भने । यस गाउँपालिकामा मात्रै अहिलेसम्म ८०० जना क्वारेन्टाइनमा रहेका छन् । भने दिनहुँ मानिसहरु थपिनेक्रम जारी छ । ‘स्कुलको एउटै कोठामा तीन चार जनालाई राख्नु परेको छ,’ उनले भने, ‘यसले त झन् संक्रमण फैलिएला भन्ने त्रास भएको छ ।’ स्थिति नियन्त्रणबाहिर जाने भएपछि नरैनापुर गाउँपालिकाले जिल्ला प्रशासन कार्यालय बाँकेलाई पत्राचार गर्दै गुहार गरेको छ ।

‘संक्रमित र निजका परिवारलाई केही व्यक्तिहरुले उक्साउने र कोरोना भाइरसको बारेमा भ्रम सिर्जनागरी सुरक्षाकर्मी कर्मचारी र स्वास्थ्यकर्मीहरुलाई असहयोग गर्ने, मनोबल कमजोर पार्ने र संक्रमित भगाउने प्रयास गर्ने जस्ता क्रियाकलाप भइरहेका छन् । यस्तो अवस्थामा क्वारेन्टाइनबाट समुदायस्तरसम्म संक्रमण फैलिने र स्थिति भयावह हुने सम्भावना देखिएको सन्दर्भमा स्थिति नियन्त्रणभन्दा बाहिर जाने अवस्था देखिएकाले तत्काल उच्चस्तरीय चिकित्सक टोलीसहित थप सुरक्षाकर्मी परिचालन गरी नियन्त्रण कार्यलाई अगाडि बढाउने व्यवस्थाका लागि अनुरोध छ,’ प्रधानमन्त्री तथा मन्त्रिपरिषदको कार्यालयलाई बोधार्थ दिँदै गरिएको पत्राचारमा लेखिएको छ ।

नेपालगन्जदेखि करिब ३५ किलोमिटर दक्षिणपूर्व राप्तीपारि भारतीय सीमासँग जोडिएको नरैनापुरमा पहिलो पटक भारतबाट आएका आठ जनामा यही जेठ २ गते कोरोना सङ्क्रमण देखिएको नरैनापुरमा एक हप्ताभित्र एक जनाको ज्यान जाने गरी सङ्क्रमितको सङ्ख्या ८७ पुगेको थियो । शनिबार २७ जना थप भएको छ । ठूलो सङ्ख्यामा सङ्क्रमित भेटिएपछि जेठ ५ गतेदेखि नरैनापुर गाउँपालिकालाई पूर्णरुपमा सिल गरी सतर्कता अपनाइएको छ तर सङ्क्रमण रोकिएको छैन । यससँगै जिल्लामा १४२ जनामा कोरोना संक्रमण भएको छ भने २१ जना निको भएर घर फर्किसकेका छन् ।

लापर्वाहीले सङ्क्रमण बढ्दो

नरैनापुरमा स्थानीयवासीको लापर्वाहीले कोरोना सङ्क्रमण बढ्दै गएको छ । सङ्क्रमितलाई आइसोलेसन अस्पताल ल्याउनमा रोक लगाउँदा तथा क्वारेन्टाइनमा अनावश्यकरुपमा हुलहुज्जत गर्दा समुदायस्तरमै कोरोना सङ्क्रमण दैनिकरुपमा बढिरहेको छ । कोरोना भाइरस सम्बन्धी समुदायस्तरमा गलत बुझाइ र पछिल्लो समयमा सङ्क्रमित आइसोलेशनमा बस्न अटेरी गर्दा सङ्क्रमणको जोखिम झन् बढ्दो छ । नरैनापुरका सङ्क्रमितको अटेरीका कारण उनीहरुलाई समयमै आइसोलेशनमा ल्याउन समस्या हुने गरेको जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले जानकारी दिए ।

उनअनुसार शुक्रबार पुष्टि भएका नरैनापुर ३ का सङ्क्रमितले आइसोलेसन कक्षमा आउन नमान्दा शुक्रबार राति १२ बजे १२ जनालाई लिइएको छ भने क्वारेन्टिनबाटै फरार एक जनालाई आज मात्रै फेला पारेर ल्याउन सकिएको छ । स्वास्थ्य र सुरक्षाकर्मी तथा एम्बुलेन्स चालकले आफ्नो ज्यान जोखिममा राखेर काम गरिरहँदा नरैनापुरका सङ्क्रमित र स्थानीयवासीले सहयोग नगरेको उनको भनाइ छ । नरैनापुरमा मात्रै शनिबार ८७ जना सङ्क्रमित पुगेका छन् ।

नरैनापुरका बासिन्दा तथा जिल्ला समन्वय समिति बाँकेका प्रमुख अजय श्रीवास्तव शिक्षा, स्वास्थ्य र सचेतनाको कमीका कारण नरैनापुरमा कोरोना सङ्क्रमण बढ्दै गएको बताउँछन् । बाँकेका प्रहरी उपरीक्षक वीरबहाद्र वलीले स्थानीयवासी र अन्य सरोकार पक्षले असहयोग गर्दा नरैनापुरबाट सङ्क्रमितलाई ल्याउन पटकपटक कठिन परिस्थिति आउने गरे पनि आफूहरुले धैर्यपूर्वक काम गरिरहेको बताए । बाँकेमा सङ्क्रमितको सङ्ख्या ११६ पुगेको छ ।

सङ्क्रमितलाई तीन ठाउँमा व्यवस्थापन

बाँकेमा एकैपटक ठूलो सङ्ख्यामा देखिएका कोरोना सङ्क्रमितलाई जिल्लाका तीन स्थानमा व्यवस्थापन गरिएको छ । संक्रमितलाई बाँकेको खजुरास्थित सुशील कोइराला प्रखर क्यान्सर अस्पतालमा मात्र आइसोलेशन अस्पताल रहेकाले नेपालगञ्जको लायन्स डेण्टल अस्पताल र कोहलपुरको पिपरीस्थित कृषि विकास तालिम केन्द्रमा थप दुई आइसोलेशन केन्द्र तयार गरी सङ्क्रमितको व्यवस्थापन गरिएको स्वास्थ्य कार्यालय बाँकेका फोकलपर्शन श्रेष्ठले जानकारी दिए । यसअघि नरैनापुरमा फेला परेका आठ जनालाई दाङको बेलझुण्डीस्थित आइसोलेसन अस्पतालमा राखिएको छ ।

बिरामी भएकालाई आइसोलेसन अस्पताल र बिरामी नभएकालाई आइसोलेशन केन्द्रमा राख्ने नीतिका साथ सङ्क्रमितलाई नेपालगन्ज, कोहलपुर र खजुरामा स्थानान्तरण गरी व्यवस्थापन गरिएको फोकलपर्शन श्रेष्ठले जानकारी दिए । धेरै अट्ने आइसोलेशन अस्पताल नभएका कारण सङ्क्रमितलाई तीन ठाउँमा स्थानान्तरण गरी उपचार सेवा प्रदान गरिएको श्रेष्ठको भनाइ छ । स्थानान्तरणका क्रममा नरैनपुरमा र कोहलपुरमा स्थानीयवासीले विरोध गरेका कारण केही समय ढिलाइ भए पनि सङ्क्रमितलाई आइसोलेशन केन्द्रमा व्यवस्थापन गरिएको र सबैको स्वास्थ्यावस्था सामान्य रहेको श्रेष्ठले बताए ।