बाँके । रातको समयमा घरको आँगनमा मकै भेटिएपछि बाँकेको नेपालगञ्ज उपमहानगरपालिका–१८ मिलिजुली टोलमा त्रास फैलिएको छ । सबै सुतेपछि अज्ञात व्यक्तिले घरको आँगनमा काँचो मकै फालेर गएको पाइएको स्थानीयले बताएका छन् ।

स्थानीय मनोज डिसीले झण्डै ३० घरको आँगन र करेसाबारीमा काँचो मकै फेला परेको जानकारी दिए । उनका अनुसार उक्त टोलको कुनै पनि घर बाँकी नराखी मकै फालिएको थियो । ‘कसैको घरमा प्वाँख फालेको मकै त कसैकोमा प्वाँख नफालेको मकै फेला परेका छन्,’ उनले भने, ‘डरले प्रहरीलाई खबर गर्यौँ ।’

घरघरमा फालिएको मकै जिल्ला प्रहरी कार्यालय बाँकेको टोलीले उठाएर लगेको छ । जिल्ला प्रहरी कार्यालय बाँकेका प्रवक्ता प्रहरी नायब उपरीक्षक शिवबहादुर सिंहले स्थानीयलाई त्रास फैलाउने उद्देश्यले मकै फालिएको हुन सक्ने बताए । ‘स्थानीयको आँगन र करेसाबारीमा फालिएको मकै परीक्षणका लागि पठाइनेछ,’ उनले भने, ‘मकै फालेर त्रास फैलाउनेको प्रहरीले खोजी तिव्र पारेको छ ।’