काठमाडौं । देशका विभिन्न जिल्लामा क्वारेन्टाइनमा बसेका केहिमा औंलोको लक्षण भेटिएको स्वास्थ्य तथा जनसंख्या मन्त्रालयले जनाएको छ । तर, कहाँको क्वारेन्टाइनमा रहेका कतिमा औंलोको लक्षण देखिएको भन्नेबारे सम्पूर्ण जानकारी प्राप्त भइनसकेको मन्त्रालयले जानकारी दिएको छ ।

आज (शनिबार) स्वास्थ्य तथा जनसंख्या मन्त्रालयले नेपालमा कोरोना संक्रमणको अवस्थाबारे जानकारी दिन आयोजित पत्रकार सम्मेलनमा हालसम्म ४९ हजार ३३६ जनामा कोरोना परीक्षण गरिएको बताइएको छ । मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले ‘आरडीटी’ बाट ३९ हजार ६७० जनाको परीक्षण गरिएको र ‘पीसीआर’ बाट नौ हजार ६६६ जनाको परीक्षण गरिएको जानकारी दिएका छन् ।

गर्मीयाम शुरु भएसँगै औंलोको खतरा पनि बढेको भन्दै डा. देवकोटाले क्वारेन्टाइनमा रहेकाहरुमा पनि औलो देखिएको जानकारी दिएका छन् । यस्तै, हाल प्रदेशहरुमा २५ हजार ४४६ जनाको आरडीटी परीक्षण गरिएको भन्दै डा. देवकोटाले प्रदेश नम्बर–५ मा सबैभन्दा बढी सात हजार ९५६ जना ‘क्वारेन्टाइन’मा रहेको र सबैभन्दा कम वाग्मती प्रदेशमा रहेको जानकारी दिए ।

यता भरतपुरको कोरोना अस्पतालमा उपचारमा रहेका २७ वर्षीय युवक पनि निको भएसँगै कोरोनालाई जित्नेको संख्या १२ पुगेको र अझै ३७ जना विभिन्न अस्पतालमा उपचारमा रहेको उनले बताए । सो अवसरमा परोपकार प्रसूति तथा स्त्रीरोग अस्पतालका निर्देशक डा. जागेश्वर गौतमले गर्भवती महिलाको स्वास्थ्यमा गम्भीर समस्या देखिएमात्र अस्पताल आउन आग्रह गरे ।