बाँके । कोहलपुरमा प्रहरी हुँ भनेर मोटरसाइकल चोरी हुन थालेको छ । सादा पोशाकको प्रहरी हुँ भनेर मोटरसाइकलको कागजपत्र माग्ने र छैन भन्नेको मोटरसाइकल भोली इलाका प्रहरी कार्यालयमा लिन आउनु भन्दै लिएर जाने गरिएको छ ।

एउटा मोटरसाइकल र एउटा स्कुटी यसरी चोरी गरिएपछि इलाका प्रहरी कार्यालय, कोहलपुरले जनाएको छ । कोहलपुर मेडिकल कलेज अगाडितिर उभिरहेका डाक्टरको मोटरसाइकलको कागजपत्र मागेका चोरले भोली इप्रकामा मोटरसाइकल लिन आउनु भन्दै लगेर गएका थिए । त्यस्तै एउटा स्कुटी पनि त्यसरी नै लगेको इलाका प्रहरी कार्यालय, कोहलपुरले जनाएको छ ।

कोहलपुरका प्रहरी निरीक्षक रणबहादुर विष्टले प्रहरी हुँ भन्दै चेकजाँचका नाममा मोटरसाइकल रोकेर जबरजस्ती लिएर जाने गरेको खबर आएको बताए । कोहलपुर प्रहरीले जाँच गर्ने व्यक्ति प्रहरी भए नभएको यकिन गर्न सार्वजनिक रुपमा सूचित गरेको छ । प्रहरी निरीक्षक विष्टका अनुसार, चोरी भएका मोटरसाइकल र स्कुटीको खोजी भइरहेको छ ।