धनगढी । नेत्रविक्रम चन्द विप्लव नेतृत्वको नेकपाले कैलालीमा एकजना प्रहरीविरुद्ध नै ‘पक्राउ पुर्जी’ जारी गरेको छ । जनअदालतको नाम दिएर नेकपाले राष्ट्रिय अनुसन्धान विभागका एक असईविरुद्ध ‘पक्राउ पुर्जी’ जारी गरेको हो । कैलाली जनअदालत प्रमुख विकासको नामबाट शुक्रबार ‘पक्राउ पुर्जी’ जारी गर्दै तोकिएको समयमा जनअदालतमा उपस्थित नभए ‘इन्काउन्टर’ हुन सक्ने भनिएको छ ।

प्रहरीले देशभर विप्लवका कार्यकर्तालाई पक्राउ गरी मुद्दा चलाइरहेका बेला विप्लव समुहले प्रहरीविरुद्ध नै ‘पक्राउ पुर्जी’ जारी गरेको छ । राष्ट्रिय अनुसनधान विभागका असई भैरव कुँवरलाई २५ दिनभित्र उपस्थित हुन आदेश दिँदै कुँवरकै घर नजिक सार्वजनिक स्थानमा टाँसिएको ‘पक्राउ पुर्जी’मा लेखिएको छ, ‘कैलालीको वर्दगोरीया गाउँपालिका–१ साझा भन्ने ठाउँमा बस्ने नवराज कुँवरका छोरा भैरव कुँवरलाई २५ दिनभित्र जनअदालतमा उपस्थित हुन ‘पक्राउ पुर्जी’ जारी गरिएको हो ।’

अनुसन्धान विभागमा असई पदमा कार्यरत कुँवरमाथि नेकपाका नेता कार्यकर्ताको सुराकी, अपहरण र ज्यान मार्ने उद्योग गरेको आरोप लगाइएको छ । ‘बाटोका म्यादबाहेक २५ दिनभित्र आफैं वा पक्राउ पुर्जी बमोजिम पक्राउ परी यस अदालतमा हाजिर हुन आउनु होला,’ उक्त पक्राउ पुर्जीमा उल्लेख छ । असई कुँवरविरुद्ध नेकपाका कार्यकर्ता ‘तुफान’ले अभियोग दर्ता गराएको र जनसरकार प्रमुख अनुकलले प्रतिवेदन बुझाएकाले सोहीका आधारमा पक्राउ पुर्जी जारी गरिएको नेकपाको दाबी छ ।

आफैं वा पक्राउ परी आएमा जनअदालतले व्यवहार बुझेर जनअदालतको कानुनअनुसार कारवाही हुने उल्लेख छ । तोकिएको म्यादमा उपस्थित नभएमा जुनसुकै कारबाही गर्ने चेतावनी नेकपाले दिएको छ । जनसुरक्षा विभागलाई जुनसुकै बेला पनि कारवाही गर्न आदेश दिइएको पक्राउ पूर्जीसँगै टाँसिएको ‘चेतावनी पत्र’ मा भनिएको छ । ‘म्याद गुजारी फरार रहेमा देश र जनताको हितविरुद्ध नेता कार्यकर्ताको सुराकी, हत्या, अपहरण र यातनामा संलग्न रहेको पाइएमा, जिल्ला जनसुरक्षा विभागलाई जुनसुकै बेला पनि ’इन्काउन्टर’ गर्न आदेश दिइएको छ’, चेतावनी पत्रमा उल्लेख छ ।

कैलालीका प्रहरी उपरीक्षक सुदिप गिरीले पक्राउ पुर्जी जारी गरेको भनिएका व्यक्ति प्रहरीको अनुसन्धान विभागमा कार्यरत भए नभएको भेरिफाइ गर्नुपर्ने बताए । ‘सेना र प्रहरीमाथि आक्रमण नगर्ने भन्ने उहाँहरूको केन्द्रीय नीति सुनेका छौँ,’ उनले भने, ‘तल्लो तहमा यस्ता गतिविधि हुन्छन् भने उहाँहरूकै पार्टीभित्र विरोधाभाष देखिन्छ ।’ ठूलो संख्यामा नेता कार्यकर्ता पक्राउ परेका कारण विप्लव नेतृत्वको पार्टी अत्तालिएको र टेलिफोनका टावरमा आक्रमण गर्नेदेखि राष्ट्रसेवक कर्मचारीमाथि यस्ता हर्कतमा उत्रिएको हुन सक्ने उनले प्रतिक्रिया दिए । नागरिकको सुरक्षामा प्रहरी प्रतिबद्ध रहेको उनको भनाई छ ।