काठमाडौं । केही दिन यता सामाजिक सञ्जालमा भ्यागुताको विवाह र डिभोर्स बारेको प्रसंग चर्चामा छ । सामाजिक सञ्जालमा कुनै न कुनै विषयमा चर्चा र त्यसलाई भाइरल नबनाइ बस्नै नसक्ने नेपालीको लागि यो नयाँ किस्सा बनेको छ । भ्यागुताको विवाह गरेको समाचार बेलाबेलामा सञ्चारमाध्यममा र गाउँठाउँमा सुन्ने गरिएकै हो ।

तर डिभोर्सबारे त पहिलो पटक सुनियो त्यो पनि भाइरल बन्ने गरि । तपाईलाई पनि चित्त बुझेर वा रमाइलो लागेर उक्त पोस्ट शेयर गर्नु भएको होला । तर त्यसको वास्तविकता तपाईलाई थाहा छ ? किन उनीहरुको डिभोर्सको कागज तयार भयो भन्ने ? भ्यागुताको जोडीको डिभोर्सको व्यहोरा भएको तमसुक पढ्नु भन्दा पहिला विवाहको प्रसंगबारे जान्न जरुरी छ ।

भ्यागुताको विवाह

असार महिना सकिनै लाग्दासमेत देशमा मनसुन सक्रिय हुन सकेन वा पानी पर्न सकेन । पानी नपरेपछि खेती किसानी गर्नेलाई ठूलो समस्या पर्न गयो । सिचाइको सुविधा नभएको देशमा आकाशे पानीको भर पर्नुपर्ने त्यसमा पनि असार सकिनै लाग्दा पनि पानी नपरेपछि किसानहरु हैरान भए ।

वर्षभरि के खाने भन्ने चिन्ताले उनीहरुलाई सतायो । सरकारलाई सिचाइको व्यवस्था गर अनि खेत रोप्छौं भन्नु भन्दा उनीहरुले धार्मिक सांस्कृतिक रुपमा पानी पार्ने उपाय खोजे । पानी नपरेपछि किसानहरुले ‘हरहर महादेव पानी देउदेउ’ भन्दै एक लाख पिपलका पातमा लेखेर नदीमा बगाएन् कि एक जोडी भ्याकुता खोजेर विवाह गरिदेनन् ।

मोरङको रंगेलीको संसारी माइ मन्दिरमा स्थानीय किसानले भाले र पोथगी भ्यागुतको विवाह नै गराइदिए । मन्दिरमा विधवत रुपमा भव्य खालको विवाह सम्पन्न भएको थियो । वैदिक मन्त्र पढेर नै भ्यागुताको विवाह भयो । त्यो पनि पोथी भ्यागुतोलाई चुरा पोते सिन्दुर लगाइदिएर । त्यसपछि उनीहरु पति पत्नी बने ।

भ्याकुताको विवाह गरेपछि इन्द्र भगवान (धार्मिक मान्यता अनुसार वर्षाका देवता) खुसी भएछन् क्यार ! त्यसको केही दिनपछि गडगडाहटसहित वर्षा भयो । भ्यागुताको विवाहपछि पानी यस्तो पर्यो कि अहिलेसम्म ६७ जनाको बाढी पहिरोका कारण ज्यान गइसकेको छ भने ३० जना वेपत्ता भएका छन् ।

यस्तो भएपछि भ्यागुताको विवाह गराउने र विवाह गरेपछि पानी पर्छ भन्नेहरुलाई पर्यो आपत ! अब पानी बन्द गर्नका लागि के गर्ने ? यसबीचमा केहीले नयाँ उपाय रचे । भ्यागुताको विवाहपछि पानी परेको हो भन्दै उक्त जोडीको डिभोर्स गर्ने उपाय निकाले र यसको डिभोर्सको कागज नै बनाए । त्यसअघि नै सामाजिक सञ्जालमा पानी लगातार परेपछि पोस्टहरु सार्वजनिक भए ।

जसमा लेखिएको थियो , ‘अस्ति पानी परोस् भनेर भ्यागुतोको विहे गर्दिनेले तुरुन्तै उनीहरुको डिभोर्स गर्दिनुपरो । पानीले हद पार गरिसक्यो ।’ यो सयौं सामाजिक सञ्जाल प्रयोगकर्ताले सेयर गरे जसमध्ये तपाई पनि पर्नुभयो होला । समाजिक सञ्जालमा यस्तो माग उठिरहेको बेला एक जना युवाले नयाँ आइडिया लगाए ।

उनले दुईवटा भ्यागुता खोजेर ल्याएर नेपाली कागजमा व्यहोरा लेखेर भ्यागुताको डिभोर्स गराए । यस्तो लेख्ने को होला ? कहिल्यै सोच्नु भयो ? डिभोर्सको व्यहोरा पढ्नु भयो भने मनमनै हास्नु भयो होला । तर यस्तो आइडिया निकाले मोरङ जिल्लाका प्रकाश बाँनियाले । उनले दुईवटा भ्यागुता खोजेर ल्याए, डिभोर्सको व्यहोरा लेखे दुईवटा भ्यागुतालाई समातेर तस्वीर खिचे र सामाजिक सञ्जालमा पोस्टिए जसलाई धेरै मानिसले सेयर गरेका छन् ।

यस्तो छ डिभोर्सको व्यहोरा