बाँके । खजुरा गाउँपालिका र चाइना इन्स्टिच्यूट फर साउथ को–अपरेशन इन एग्रिकल्चरबीच मंगलबार उज्वेकस्तानमा ‘ग्रीन खजुरा’ पाइलट प्रोजेक्टका लागि सम्झौता भएको छ ।

उज्वेकस्तानमा सञ्चालन भइरहेको ग्रीन एकोनोमी कार्यक्रममा सहभागी खजुरा गाउँपालिका प्रमुख किस्मतकुमार कक्षपतिले ‘हरित कृषि र हरित शहरीकरण’का लागि सम्झौतामा हस्ताक्षर गरेका हुन् ।

खजुरा गाउँपालिका प्रमुख कक्षपति र युएन प्रमुख बीच विभिन्न देशका प्रतिनिधिको रोहवरमा सम्झौतामा हस्ताक्षर भएको हो । खजुरामा पाइलट प्रोजेक्टका रुपमा उक्त कार्यक्रम शुरु भए पनि हरित कृषि र हरित शहर निर्माणका लागि सन् २०२० देखि प्रोजेक्ट अगाडि बढ्नेछ ।

गाउँपालिका प्रमुख कक्षपतिले प्रोजेक्टको लागत यसको मोडालिटीलगायतका विषयमा पनि छलफल गरेर टुङ्गो लगाइने बताए । उनले हरित खजुरा बनाउने अभियानका लागि ठूलो सफलता हात लागेको बताउँदै प्रमुख कक्षपतिले यसलाई अगाडि बढाइने उल्लेख गरे ।

गत वर्ष दुबईमा आयोजित एक कार्यक्रममा सहभागी भएका खजुरा गाउँपालिका प्रमुख किस्मतकुमार कक्षपतिले खजुरा गाउँपालिकालाई ग्रीन सिटीका रुपमा विकास गर्न गरेको प्रस्तुतीकरणपछि यो कार्यक्रम अगाडि बढेको थियो । ग्रीन खजुराका लागि भएको सम्झौतापछि खजुराबासीमा खुशीयाली छाएको छ ।

खजुरा गाउँपालिका उपप्रमुख एकमाया विकले खजुराको दीगो विकासमा यसले टेवा पुग्ने बताइन । खजुरा गाउँपालिका प्रमुख प्रशासकीय अधिकृत बमबहादुर केसीले सम्झौताको हृृदयदेखि स्वागत गर्दै यसलाई कार्यान्वयनको दिशामा लैजान आतुर भएको बताए ।

यो प्रोजेक्ट भित्र्याउनका लागि खजुरा गाउँपालिका विज्ञ समूह सदस्य पूर्णचन्द्र उपाध्याय, प्राविधिक प्रमुख कञ्चन तिवारी, आइटी अफिसर सुरेश शाहु, रोजगार प्रमुख महेन्द्र रेग्मी आन्तरिक सहयोगीको रुपमा थिए ।

कृषि तथा हरित खजुराका लागि भएको सम्झौतापछि प्रतिक्रिया दिँदै विज्ञ सदस्य पूर्णचन्द्र उपाध्यायले खजुराबासीका लागि मात्र नभई देशकै लागि नमूना र उदाहरणीय काम भएको भन्दै कृषिमा दीगो विकासका लागि नमूना हुने बताए ।

प्राविधिक प्रमुख कञ्चन तिवारीले हरित कृषि र हरित शहरीकरण प्रोजेक्ट लागू भएपछि खजुरा संसार भरीकै रिसर्च सेन्टरका रुपमा विकास हुनुका साथै कृषिका विषयमा अनुभव साटासाट, खजुरा कृषि क्याम्पसको सपना पूरा हुने धारणा राखे ।

आइटी अफिसर सुरेश शाहुले यसका अन्तरबस्तु तथा कार्यक्रमहरु वेभसाइटमार्फत राखिने भएकाले संसारले हेर्न सक्ने बताए । रोजगार प्रमुख महेन्द्र रेग्मीले भने –यो अत्यन्तै खुशीको कुरा हो हामीले गरेको मेहनतको परिणाम प्राप्त भएको छ ।

खजुरा ग्रीन सिटी तथा कृषिको दीगो विकासका लागि यसअघि युएन तथा चाइनाको टीम खजुरा गाउँपालिका आई अध्ययन अवलोकन गरेर फर्केको थियो ।