बाँके । प्रदेश पाँचका विभिन्न जिल्लामा जारी आठौं राष्ट्रिय खेलकुद प्रतियोगिता २०७५/०७६ को आज औपचारिक समापन गरिदैछ । प्रतियोगिताको समापन उपराष्ट्रपति नन्दबहादुर पुनले गर्ने भएका छन् । बैशाख ५ गते राष्ट्रपति विद्यादेवी भण्डारीले उद्घाटन गरेको आठौं राष्ट्रिय खेलकुदको समापन उपराष्ट्रपतिले गर्नुहुने राष्ट्रिय खेलकुद परिषदले जनाएको छ ।

यसअघि ५ नम्बर प्रदेश खेलकुद विकास समितिले सार्वजनिक गरेको कार्ययोजना अनुसार प्रतियोगिताको समापन कार्यक्रम प्रधानमन्त्री केपी शर्मा वलीले गर्ने तय भएको थियो । अन्तिम समयमा प्रधानमन्त्रीको कार्यव्यस्तताका कारण आउन नसक्ने भएपछि उपराष्ट्रपतिबाट प्रतियोगिता समापन गर्ने तय भएको प्रदेश खेलकुद विकास समिति प्रदेश ५ का अध्यक्ष भीम वलीले जानकारी दिए । ‘प्रधानमन्त्री ज्यूको कार्यव्यस्तताका कारण समापन कार्यक्रम उपराष्ट्रपतिबाट गरिदैछ,’ प्रदेश अध्यक्ष वलीले भने ।

लोकतन्त्र दिवसका अवसरमा काठमाडौंमा आयोजना हुने कार्यक्रमपश्चात उपराष्ट्रपति भोली दिउँसो १ बजे श्री एयरलाइन्सको विमानमार्फत नेपालगन्ज आइपुग्नु हुने राष्ट्रिय खेलकुद परिषद (राखेप)ले जनाएको छ । राखेपका अनुसार यतिवेला अन्तिम खेलहरु भइरहेका छन्, समापन कार्यक्रमलाई लक्षित गर्दै सबै तयारीहरु पुरा भइसकेको छ । प्रतियोगिताको समापन ११ गते दिउँसो ३ बजे गर्ने तयारी छ ।

बाँकेबासीले गरे प्रधानमन्त्रीको आलोचना

आठौं राष्ट्रिय खेलकुद प्रतियोगिताको समापन समारोहमा प्रधानमन्त्री वली नआउने खबर पाएसगैं बाँकेबासीले उनको आलोचना गरेका छन् । नेपालगन्जमा खुलेको होटल सोल्टी वेस्टेण्ड प्रिमियरको उद्घाटनका लागि प्रधानमन्त्रीलाई फुर्सद हुने तर, मुलुककै खेलकुदको महाकुम्भको समापनमा आउन नसक्नुले उनको प्राथमिकतामा खेलकुद नरहेको भन्दै बाँकेबासीले आलोचना गरेका हुन् ।

बाँकेबासीले प्रधानमन्त्रीको नेपालगन्जमा स्वागतसँगै जिल्लाका समस्याहरु उनीसमक्ष राख्ने तयारी भइरहेका बेला पन्छिन खोजेको भन्दै खेलकुद र खेलाडीहरुलाई महत्व नदिएको भन्दै आलोचना गरेका छन् । गतसाता भेरी बबई ड्राइभर्सन बहुउद्देश्यीय आयोजनाको सुरुङ उद्घाटनका लागि नेपालगन्ज हुँदै सुर्खेत पुगेका प्रधानमन्त्रीले सोही क्रममा नेपालगन्जस्थित पूर्वराजा ज्ञानेन्द्र शाहको सोल्टी होटलको औपचारिक उद्घाटन गरेका थिए ।

‘प्रधानमन्त्रीले खेलकुदको समापन समारोहमा उपस्थिती जनाइदिनुपर्ने हो । आयोजकले राष्ट्रपतिको समय व्यवस्थापन गराउन सक्ने तर, प्रधानमन्त्रीको समय व्यवस्थापन हुननसक्ने यो कस्तो विडम्बना हो । खेलकुद र खेलाडीलाई लत्याएर प्रधानमन्त्रीले आफ्नो लोकप्रियता गुमाउनुभयो,’ नेकपा बाँकेका एक नेताले भने, ‘पूर्वराजाको होटल उद्घाटनमा आउन मिल्ने तर, खेलकुदको कार्यक्रममा आउन नमिल्ने कस्तो खालको राजनीति हो यो बुझ्नै अप्ठेरो ।’