बाँके । बाँकेको कोहलपुरमा बस र कार एकआपसमा ठोक्किँदा चारजना गम्भीर घाइते भएका छन् । गम्भीर घाइते हुनेमा सन्तोष जोशी, लक्ष्मण थापा, विजय चौधरी र गौरी जोशी रहेका छन् । महेन्द्रनगरबाट बुटवल जाँदै गरेको ना ४ ख ९२४२ नम्बरको बस र काठमाडौंदेखि सुर्खेत जाँदै गरेको बा ४ च १४२४ नम्बरको कार बाँकेको कोहलपुरस्थित रोहिणी खोला नजिक एकआपसमा ठोक्किएका हुन् ।

बुटवल जादैं गरेको बसले अर्को बसलाई ओभरटेक गरि अगाडी जाने क्रममा विपरित दिशाबाट आएको कारलाई ठक्कर दिएको हो । तिव्र गतिमा रहेको बस र कार ठोक्किएपछि बस पल्टिँदा चार जना गम्भीर घाइते भएका छन् भने १० जना सामान्य घाइते भएको जिल्ला ट्राफिक प्रहरी कार्यालय बाँकेका प्रहरी नायव निरीक्षक ओम पौडेलले जानकारी दिए । घाइतेहरुको नेपालगन्ज शिक्षण अस्पताल कोहलपुरमा उपचार भइरहेको छ । ‘घाइतेमध्ये चारजनाको अवस्था गम्भीर छ,’ प्रहरी नायव निरीक्षक पौडेलले भने, ‘कारमा सवारलाई सामान्य चोट लागेको छ ।’