एक सवारी चालकको मोबाइल नियन्त्रणमा लिएर सिडओलाई भोट गर्दै ट्राफिक प्रहरी

बर्दिया । बर्दियाको सडकमा गुड्ने सवारी साधनलाई प्रहरीले फरक उद्देश्यले रोक्न थालेको करिब एक हप्ता भएको छ । अपराधी खोजीवनका लागि प्रहरी परिचालन भएको होइन । न त सवारी नियम नियमन गर्न प्रहरीले गुडिरहेका सवारी रोक्न थालेको हो ।
चालकको मोबाइल नियन्त्रणमा लिनका लागि प्रहरीले सडकमा गुड्ने सवारी साधनलाई रोकिरहेको हो । ‘चार–पाँच दिन भइसक्यो मोबाइल खोसेर प्रहरीले आइडलमा भोट गर्ने गरेको छ,’ सदरमुकाम गुलरियाका स्थानीयबासी त्रिदेव घिमिरले भने, ‘अगाडि इन ४ लेखिएको मेसेज ३४००१ मा एसएमएस गरेपछि मोबाइल फिर्ता पाइन्छ ।’
सार्वजनिक प्रशासनका इमान्दार, जवाफदेही र कर्तव्यनिष्ठ कर्मचारी छान्न अकाउन्टिबिलिटी ल्याब नामक संस्थाले भोटिङ गराइरहेको हो । भ्रष्टाचारविरोधी र नागरिकमैत्री छवि भएका कर्मचारी छान्न ‘इन्ट्रेगेटी आइडल अवार्ड’का लागि भोटिङ भइरहेको हो । सार्वजनिक सेवामा कार्यरत कर्मचारीमध्येबाट अकाउन्टिबिलिटी ल्याबले वर्षेनी सरकारी कर्मचारीलाई ‘इन्ट्रिगेटी आइडल अवार्ड’ प्रदान गर्दै आएको छ ।
इन्ट्रिगेटी आइडलको एसएमएस भोटिङ नम्बर ३४००१ रहेको हो । अकाउन्टिबिलिटी ल्याबकाअनुसार इन्ट्रिगेटी आइडलमा भोट गर्ने समय मंसिर १७ गते सोमबार राति १२ बजेसम्म छ । यो वर्षको इन्ट्रिगेटी आइडलको अन्तिम पाँच प्रतिस्पर्धीमा बर्दियाका प्रमुख जिल्ला अधिकारी सहसचिव रामबहादुर कुरुङबाङ पनि परेका छन् । आफूलाई जिताउन उनले पद तथा शक्तिको दुरुपयोग गर्दै आफू अन्तर्गतका प्रहरी परिचालन गरेकोमा सर्वसाधारण आकोशित छन् ।

साइकल यात्रुको मोबाइलबाट भोटिङ गर्दै प्रहरी

प्रहरीले ठाँउठाँउमा चेकजाँचका नाममा सवारी चालकदेखि साईकल यात्री र स्थानीय पसलेसम्मको मोबाईल नियन्त्रणमा लिएर भोट गरिरहेको हो । बर्दिया प्रहरीका प्रहरी निरीक्षक लक्ष्मण वली नेतृत्वमा रहेको टोलीले भलागौडी नजिक सार्वजनिक बस तथा निजी सवारी साधन रोकी मोबाइल नियन्त्रणमा लिएर भोट गरिरहेको एक स्थानीयले नेपालखबरलाई जानकारी दिए ।
तल्लो तहका एक प्रहरी अधिकृतका अनुसार बर्दिया प्रहरी प्रमुख एसपी सुरेन्द्र मैनालीको निर्देशनमा यो काम भएको हो । प्रमुख जिल्ला अधिकारीलाई भोट हाल्न यात्रु तथा सवारी चालकलाई सास्ती दिएको विषयमा सामाजिक सञ्जालमा समेत बहस भइरहेको छ । प्रहरी हर्कतबाट पीडितहरुले प्रहरीले सार्वजनिक सावरी साधन रोकेर एसएमएस गरिरहेका तस्विरहरु फेसुबक, ट्विटरमा पोष्ट गर्दै आक्रोश पोखिरहेका छन् ।
बर्दियाका प्रहरी प्रमुख एसपी सुरेन्द्र मैनालीले प्रमुख जिल्ला अधिकारीलाई जिताउन प्रहरी परिचालन नभएको दाबी गरे । ‘यो त्यति गाडी चल्ने जिल्ला पनि होइन । पसल पनि धेरै छैनन् । प्रहरीले त्यसो गर्ने कुरा पनि भएन,’ उनले भने । अरु जिल्लामा यस्तो हर्कत भएको हुनसक्ने उनले दाबी गरे । प्रमुख जिल्ला अधिकारी कुरुङबाङगको मोबाइल नम्बरमा सम्पर्क गर्न प्रयास गर्दा फरवार्डमा राखिएकाले सम्पर्क हुन सकेन ।