बाँके । भारत पञ्जाबस्थित अमृतसर सहरमा रेलले किच्दा ७० जनाको मृत्यु भएको छ । शुक्रबार साँझ करिब साढे ६ बजेको उक्त घटनामा १४२ जना घाइते भएका छन् । भारतीय सञ्चारमाध्यमका अनुसार अमृतसर सहरमा रावणको पुत्ला जलाउने पर्व ‘दशहरा’ मनाइरहेका बेला छुटेको रेल मानिसहरूको भीडमा पुगेको थियो ।
लिक छेउमै पुत्ला जलाउँदै गरेका स्थानीयको भीडले रेल आइरहेको नदेखेको बताइएको छ । प्रत्यक्षदर्शीले पुत्ला जलाइन लागेको भीडको आवाजले रेल आफूतिर आउँदै गरेको नसुनेको बताएका छन् । अधिकारीहरूका अनुसार दिल्लीबाट अमृतसर र अमृतसरबाट हावडाका लागि छुटेका दुई रेल एकैचोटी आमनेसामने हुँदा स्थानीय दुई रेलको बीचमा परेका थिए ।
हावडा छुटेको रेलको रफ्तार ८५–९० किलोमिटर प्रतिघन्टा थियो । यही रेलले धेरै मानिसहरूलाई किचेको अनुमान गरिएको छ । मानिसहरू भीड भएको ठाउँ पार गर्न यो रेललाई पाँच सेकेन्ड पनि लागेको थिएन । अर्को रेलको रफ्तार ६०–६५ किलोमिटर प्रतिघन्टा थियो ।
अमृतसर सरहमा रावणको पुत्ला दहनका क्रममा पटाकाहरू पड्काइएको थियो । त्यसको आवाजका कारण मानिसहरूले रेल आफूतिर आइरहेको पत्तै पाएनन् । मृतकहरूमा बुढाबुढी, महिला तथा बालबालिका बढी छन् । उनीहरू उत्तरप्रदेश–बिहारमा बस्नेहरू थिए । अमृतसार प्रहरीका आयुक्त एसएस श्रीवास्तवका अनुसार जहाँ रावणको पुत्ला जलाइएको थियो, त्यस ठाउँ सानो भएका कारण धेरै मानिसहरूलाई बस्ने व्यवस्था थिएन ।
कोही लिक छेउछाउ थिए, कोही लिकमै थिए । रेलको ठक्करबाट लाशहरू सयदेखि डेढ सय मिटरसम्म उछिट्टिएका थिए । दशहराको बाँण महिला पार्षद विजय मदानका छोरा सौरब मदानले प्रहार गरेका थिए । सो कार्यक्रममा प्रशासनले सुरक्षाको भरपर्दो व्यवस्था नमिलाउँदा भयानक घटना घटेको स्थानीयले बताएका छन् ।
रेल छुटेको समयबारे स्थानीय अनभिज्ञ थिए । कार्यक्रमका लागि स्थानीय प्रशासनको अनुमति पनि थिएन । कार्यक्रम आयोजक कांग्रेस पार्षद विजय मदानका छोरा सौरभले अनुमतिमै कार्यक्रम गरेको दाबी गरेका छन् । प्रहरीका अनुसार दशहराको कार्यक्रममा चार हजारभन्दा ज्यादा मानिस थिए । प्रहरीको सुरक्षा व्यवस्था नै थिएन ।
कार्यक्रममा पञ्जाब सरकारका मन्त्री नवजोत सिंह सिद्धुकी पत्नी नवजोत कौर प्रमुख अतिथि थिइन् । शुक्रबार रावणको पुत्ला जलाउने कार्यक्रमको समय ५ः५५ तोकिएको थियो । हरेक वर्ष यही समयमा कार्यक्रम सुरू गरिन्थ्यो । तर, प्रमुख अतिथि ढिलो पुगेकी थिइन् ।
रेलवे प्रशासनलाई रेल छुट्ने समयबारे पूरा जानकारी थियो । हरेक वर्ष यही ठाउँमा कार्यक्रम आयोजना हुने गरेको छ । तर, पनि रेलवे प्रशासनले त्यहाँ कार्यक्रम नगर्न चेतावनी दिएको थिएन । भारतीय प्रधानमन्त्री नरेन्द्र मोदीले घटनास्थलमा तुरुन्तै उद्धार र सहयोग गर्न सम्बद्ध अधिकारीहरूलाई निर्देशन दिएका छन् । उनले घटनाप्रति दुःख व्यक्त गरेका छन् ।

#एजेन्सीहरूको सहयोगमा