बाँके । पाँच वर्षको प्रयासपछि अन्ततः नेपालगन्ज उपमहानगरपालिका खुल्ला दिसामुक्त भएको छ । नेपालगन्ज उपमहानगरपालिकाका २३ वटै वडालाई खुल्ला दिसामुक्त गरेपछि शनिबार आयोजित समारोहमा नगर प्रमुख डा धवलशम्शेर राणाले नेपालगन्ज खुल्ला दिसामुक्त भएको घोषणा गरे ।
नेपालगन्जलाई खुल्ला दिसामुक्त घोषणा गरिएसँगै नगर प्रमुख राणाले १३ बुँदे प्रतिबद्धतापत्र पनि सार्वजनिक गरेका छन् । नगरपालिकाका प्रेस सल्लाहकार शुक्रऋषि चौलागाईंका अनुसार उपमहानगरपालिकाका २३ हजार ३२८ घरधुरीमा शौचालय निर्माण भएपछि खुला दिसामुक्त घोषणा गरिएको हो ।
खुल्ला दिसामुक्त घोषणा कार्यक्रममा प्रदेश नं ५ का सदस्य मोहम्मद याकुब अन्सारीले नेपालगन्जको फोहर व्यवस्थापनमा नगरवासीले सहयोग गर्नुपर्नेमा जोड दिए । त्यस अवसरमा नगर उपप्रमुख उमा थापामगर, प्रमुख प्रशासकीय अधिकृत तोयानारायण सुवेदी, बाँके प्रहरी प्रमुख प्रहरी उपरीक्षक टेकबहादुर तामाङलगायत वक्ताले बोलेका थिए । कार्यक्रममा नेपालगन्जलाई खुल्ला दिसामुक्त बनाउने अभियानमा सहयोग पु¥याउने व्यक्ति र संघ, संस्थालाई सम्मानित गरिएको थियो ।