मुगुको ताल्चा विमानस्थलबाट नेपालगन्जका लागि उड्न तयारीमा तारा एयरको जहाज । फाइल तस्वीर

बाँके । निरन्तर भारी वर्षाका कारण नेपालगन्जबाट कर्णालीका पहाडी जिल्लाका लागि हुने हवाई उडान सेवा ठप्प भएको छ ।
आइतबार साँझदेखि शुरु भएको वर्षाले नेपालगन्जबाट कर्णाली क्षेत्रअन्तरगतका जिल्लामा हुने सबै हवाई उडान सोमबारदेखि बन्द रहेको नागरिक उड्डयन कार्यालय, नेपालगन्जका सूचना अधिकारी कृष्ण गौतमले बताए ।
नेपालगन्जबाट जुम्ला, हुम्ला, डोल्पा र मुगुमा दैनिक उडान हुने गरेका छन् । हुम्लाका लागि उडान नहुँदा ५०० भन्दा बढी भारतीय तीर्थयात्री यहाँका विभिन्न होटलमा अलपत्र परेका छन् । कर्णालीबाहेक काठमाडौँको उडान मात्र नियमित रहेको सो कार्यालयले जनाएको छ ।