
काठमाडौं । नेकपा एमाले र नेकपा माओवादी केन्द्रको एकतापछि बनेको नेपाल कम्युनिष्ट पार्टीको पहिलो केन्द्रीय बैठकले ८ वटा निर्णय गरेको छ । प्रधानमन्त्री निवास बालुवाटारमा बसेको बैठकले दुवै पार्टीको नाममा रहेका चल तथा अचल सम्पत्ति नेपाल कम्युनिष्ट पार्टीका नाममा गर्ने निर्णय गरेको हो । त्यस्तै विभिन्न ठाँउमा दुई पार्टीका नाममा दर्ता भएका नाम नेपाल कम्युनिष्ट बनाउन कानुनी प्रकृया अगाडि बढाउने समेत निर्णय गरेको छ ।
नाम परिवर्तन गर्ने जिम्मा नेकपा एमालेका तर्फबाट नेता सुबास नेम्वाङ र केन्द्रको तर्फबाट देव गुरुङलाई दिइएको छ । उनीहरुले अधिवक्ता मुक्ति प्रधानको नेतृत्वमा रहेको तीन सदस्यले सघाउने छन् । बैठकले आज नै निर्वाचन आयोगमा दल दर्ता गर्ने निर्णयसमेत गरेको छ । त्यस्तै एकतापछि बनेको ४४१ केन्द्रीय सदस्यले बालुवाटारमा सपथ समेत लिएका छन् ।
निर्णयहरु :
१) दल एकीकरण भएको निर्णय गरियो ।
२) पार्टी नामाकरण सम्बन्धमा छलफल गर्दा नेपाल कम्युनिष्ट पार्टी रहने निर्णय गरियो ।
३) दलहरुबीचको सम्झौता र सहमति पारित गर्ने निर्णय गरियो ।
४) राजनीतिक प्रतिवेदन र आन्तरिक विधान सम्बन्धमा माधबकुमार नेपाल र रामबहादुर थापा ‘बादल’ले तयार पारेको प्रतिवेदनलाई सम्सोधन सहित पारित गर्ने निर्णय गरियो ।
५) दलको निर्वाचन चिन्ह ‘सूर्य’ रहने निर्णय गरियो ।
६) दलको सम्पत्ति र दायित्वसम्बन्धि प्रस्ताव उपर छलफल हुँदा साविकमा रहेका नेकपा एमाले र नेकपा माओवादी केन्द्रको नाममा रहेका सबै सम्पति र दायित्वहरु एकिकरण भएको दल नेकपामा सर्ने निर्णय गरियो ।
७) एकिकरण भएको दल नेकपाको दल दर्ता लगायतका प्रायोजनका लागि साविकको नेकपा एमालेबाट सुवास नेम्वाङ र नेकपा माओवादी केन्द्रबाट देवप्रसाद गुरुङलाई अधिकार प्राप्त व्यक्ति तोक्ने र निजहरुलाई सहयोग गर्न वरिष्ठ अधिवत्ता मुक्ति प्रधान, अधिवक्ता बाबुराम दाहाल र अधिवक्ता रमेश बराललाई तोक्ने निर्णय गरियो ।
८) एकिकरण भएको दल नेकपाको केन्द्रिय समितिको संख्या ४४१ जनाको रहने तथा आज यस पहिलो बैठकमा उपस्ति भएका सबै केन्द्रिय सदस्यले हस्ताक्षर गरी निर्वाचन आयोगमा दल दर्ता प्रक्रियाका लागि अगाडि बढ्ने निर्णय गरियो ।
।