काठमाडौं । गायक सिताराम पोखरेलको नयाँ गीत ‘स्वार्थ तिम्रो’को भिडियो सार्वजनिक भएको छ । राजधानीमा सोमबार आयोजित कार्यक्रममा फिल्म निर्देशक लक्ष्मीनाथ शर्मा र चलचित्र पत्रकार संघका अध्यक्ष सन्दिप सापकोटाले भिडियो सार्वजनिक गरे ।
भिडियोमा गायक सिताराम, नायिका अनु शाह, नायक सुवास पराजुली, अर्जुन गौतम र बाल कलाकार प्रांस तिवारीको अभिनय छ । गीतमा रमेश अधिकारीको शब्द र करणराज कार्कीको संगीत रहेको छ । भिडियोमा जनकदीप पराजुलीको निर्देशन, अर्जुन तिवारीको छायांकन र निशान घिमिरेको सम्पादन छ ।
२०४४ सालमा रेडियो नेपालबाट ‘सजाई दियौ जिन्दगी नै मेरो’ बोलको गीत रेकर्ड गराएर सांगीतिक यात्रा शुरु गरेका सितारामले हालसम्म ‘खोजि हेरिनौ’, ‘विना कारण’, ‘स्पार्क’, ‘अटोबर फोर’, ‘सम्मान’ र ‘सम्मान २’ एल्बम बजारमा ल्याइसकेका छन् । गायक पोखरेलले नयाँ गीतमा आफूले नयाँ प्रयोग गरेको बताए । ‘गीतको भिडियो दर्शकका लागि रुचीकर बन्न सक्छ । किनकी यसमा हामीले नयाँ सोचको प्रयोग गरेका छौं,’ उनले भने ।

भिडियोमा गायक सीताराम आर्मीको कमान्डरको भूमिकामा छन् । उनकी पत्नीको भूमिकामा रहेकी अनुले उनलाई धोका दिन्छिन् । सीतारामले धोकालाई प्रतिशोधमा बदल्छन् । फिल्मीशैलीमा निर्माण गरिएको भिडियोमा प्रेमभाव, गोली हानाहान, संवाद र रोनाधोना प्रस्तुत गरिएको छ ।
निर्देशक पराजुलीले गीतको भावअनुसार भिडियोलाई अलि पृथक बनाउनका लागि फिल्मीशैली अपनाइएको बताए । भिडियो सार्वजनिक कार्यक्रमका प्रमुख अथिति वरिष्ठ फिल्मकर्मी लक्ष्मीनाथ शर्माले नेपाली फिल्मको विगतदेखि अहिलेसम्मको वस्तुस्थितिबारे आफ्नो बुझाइ प्रस्तुत गरेका थिए ।
आफ्ना भिडियोमा हिरोइनलाई नै अभिनय गराउँदै आएका गायक सीतारामको यो १७ औँ भिडियो हो । दर्शकलाई अलि बेग्लै अनूभूति दिने प्रयास स्वरूप कथानक संरचनामा भिडियो निर्माण गरिएको उनले बताए । अर्जुन तिवारीले खिचेको भिडियो झन्डै सात मिनेट लामो छ ।
गायक पोखरेलका दर्जनौ सुपर हिट सदाबहार गीतहरु बजारमा आइसकेका छन् । जसमध्ये ‘आँखाको नानी हौ तिमी’ बोलको गीतले खुबै चर्चा पाए । गायक पोखरेलले अहिलेसम्म १५० भन्दाबढी गीतहरुमा आफ्नो सुमधुर आवाज भरिसकेका छन् । गायन सँगसँगै सामाजिक कार्यमा समेत अग्रणी भूमिका खेल्दै आएका गायक पोखरेल दर्जनौ राष्ट्रिय तथा अन्तर्राष्ट्रिय क्षेत्रमा दर्जनौं पटक सम्मानित भइसकेका छन् ।

‘स्वार्थ तिम्रो’ म्यूजिक भिडियो हेर्नुस् :