भ्यूटावर निर्माणका लागि तयार गरिएको स्केच ।

रेनुका गिरी । बुटवल । रुपन्देहीको तिलोत्तमा नगरपालिका वडा नं. २ स्थित शंकरनगर वन विहार तथा अनुसन्धान केन्द्र (वनवाटिका) मा काठमाडौंको धरहरापछिको अग्लो र सुविधा सम्पन्न भ्यूटावर बन्ने भएको छ । तिलोत्तमा नगरपालिका र शंकरनगर वनविहार तथा अनुसन्धान केन्द्रको १३ करोड ५८ लाख रुपैयाँको संयुक्त लगानीमा १० तलाको भ्यूटावर बन्न लागेको हो ।
भ्यूटावर १३३ फिट अग्लो र भुइँतला ३ हजार ५९५ दशमलव ८९ वर्गफिटको हुनेछ । भ्यूटावर भवन २ कठ्ठा क्षेत्रफलमा बन्ने छ भने भ्यूटावर अन्तरगत विभिन्न पर्यटकीय पूर्वाधार र संरचनाहरु २ बिघा क्षेत्रफलमा बन्ने छन् । लिफ्ट सुविधासहित बन्ने भ्यूटावर परिसरमा सुविधायुक्त रेष्टुराँहरु र पर्यटक विश्रामका लागि बास बस्न मिल्ने वातानुकूलित कोठाहरु, लाइब्रेरीलगायत संरचनाहरु बनाउने गरी डिजाइन गरिएको छ ।
चालु आर्थिक वर्षमा भ्यूटावरका लागि तिलोत्तमा नगरपालिकाले एक करोड रुपैयाँ विनियोजन गरेको छ । भ्यूटावर निर्माणको कूल वजेटको ७० प्रतिशत तिलोत्तमा नगरपालिकाले र ३० प्रतिशत शंकरनगर वनविहार तथा अनुसन्धान केन्द्रले ब्यहोर्ने छन् । भ्यूटावरको निर्माण चार वर्षमा पूरा गर्ने सम्झौता भए पनि ठेकेदार कम्पनी प्राकृतिक निर्माण प्रालिले बजेट व्यवस्थापन भएमा दुई वर्षमै निर्माण पूरा गर्न सकिने जनाएको छ ।

भ्यूटावरको शिलान्यास गर्दै नेपाली कांग्रेस प्रदेश नम्बर ५ संसदीय दलका नेता बलदेव शर्मा पोखरेल ।

भ्यूटावरबाट बुटवल, भैरहवा र लुम्बिनीसम्म आँखाले सजिलै देख्न सकिनेछ । दुरविनको प्रयोग गर्दा भारतको गोरखपुर, नौतनवासम्मका शहरहरु देख्न सकिनेछ । भ्यूटावरको माथिल्लो तलामा एक दर्जन टेलिस्कोप जडान गरिने छन् । नेपाली कांग्रेस प्रदेश नम्बर ५ संसदीय दलका नेता बलदेव शर्मा पोखरेलले बिहीबार शिलान्यास गर्दै तिलोत्तमा नगरपालिकालाई पर्यटकीय स्थल बनाउन भ्यूटावर निर्माणले महत्वपूर्ण टेवा पु¥याउने बताए ।
तिलोत्तमा नगरपालिकाका प्रमुख बासुदेव घिमिरेले ‘तिलोत्तमा भ्यूटावर’ नगरपालिकाको गौरव र गहना हुने बताउँदै भ्यूटावर भविष्यमा नगरपालिकाको आम्दानीको एउटा महत्वपूर्ण स्रोत पनि हुने बताए । नगरपालिकाकी उपप्रमुख जागेश्वरी चौधरीले भ्यूटावरको निर्माणले समग्र तिलोत्तमाको पर्यटन प्रवद्र्धनमा नयाँ आयाम थप्ने विश्वास व्यक्त गरिन् । शंकरनगर वनविहार तथा अनुसन्धान केन्द्रका अध्यक्ष बाबुराम अर्यालले केन्द्रमा रहेको चिडियाखानालाई क्षेत्रीयस्तरमा स्तरोन्नति गर्न, बाल रेल सञ्चालन र बोटानिकल गार्डेनका लागि सहयोग गर्न प्रदेश सरकारसँग माग गरे ।