काठमाडौं । अन्जु पन्त, नेपाली गीत संगीत क्षेत्रमा चर्चित नाम हो । न बिर्सें तिमीलाई…, म तिमी बिना मरीहाल्छु, सुर्के थैली खै, तिमि रोएको पल लगायत दर्जनौ चर्चित गीतहरु उनको आवाजमा सुन्न सकिन्छन् । हालै उनै अन्जुको आवाजमा एउटी नारीको पिडा र बेदनाको कथा बोल्ने गीत ‘बदनामी…’ को म्युजिक भिडियो सार्वजनिक भएको छ ।
सेलेब्रिटी नेपाल डट कमले निर्माण गरेको म्युजिक भिडियोमा कृति भट्टराई, बुद्धि श्रेष्ठ र एलिजा बुढाथोकीले अभिनय गरेका छन् । गीतमा बिक्रम केसीको शब्द तथा संगीत रहेको छ । सुरेश काफ्लेले छायांकन तथा निर्देशन गरेको भिडियोलाई बवकाश ज्ञवालीले सम्पादन गरेका हुन् ।